АҚШдаги ўзбекистонликлар қонунларга риоя қилишга чақирилди
Нью-Йоркдаги Бош консуллик сўнгги вақтларда Ўзбекистон фуқаролари иштирокидаги ҳуқуқбузарликлар ҳақидаги хабарлар ОАВ ва ижтимоий тармоқларда кўпайганини таъкидлади.
Ўзбекистоннинг Нью-Йорк шаҳридаги Бош консуллиги АҚШда истиқомат қилаётган ва фаолият юритаётган ватандошларга мурожаат йўллаб, маҳаллий қонунларга қатъий амал қилиш ҳамда жамоат тартиби ва хулқ-атвор меъёрларини ҳурмат қилиш зарурлигини эслатди.
Қайд этилишича, сўнгги пайтларда айрим Ўзбекистон фуқаролари иштирокидаги қонунбузарлик ҳолатлари оммавий ахборот воситалари ва ижтимоий тармоқларда кенг ёритилмоқда. Консуллик бундай ҳолатлар аввало шахсий жавобгарликка сабаб бўлиши, шу билан бирга, бутун ўзбек диаспорасининг обрўсига салбий таъсир кўрсатиши мумкинлигини таъкидлаган.
Дипломатик ваколатхона АҚШда яшаётган аксарият ватандошлар ҳалол меҳнат қилаётгани, таълим олаётгани, тадбиркорлик билан шуғулланаётгани ҳамда Ўзбекистоннинг ижобий қиёфасини муносиб намоён этаётганини қайд этган.
Шунингдек, йирик халқаро тадбирлар ва спорт мусобақалари даврида Ўзбекистон ва унинг фуқароларига нисбатан жамоатчилик ҳамда ОАВ эътибори янада ортиши сабабли фуқароларнинг хатти-ҳаракатлари алоҳида аҳамият касб этиши таъкидланган.
Бош консуллик зарур ҳолларда ҳуқуқий ва консуллик ёрдамини кўрсатишга тайёр эканини билдирар экан, ватандошларни масъулиятли бўлишга, маҳаллий қонунчилик талабларига риоя этишга ҳамда Ўзбекистоннинг халқаро нуфузига путур етказиши мумкин бўлган ҳар қандай ҳаракатлардан тийилишга чақирган.
Эслатиб ўтамиз, аввалроқ АҚШда 4,5 миллион долларлик товарларни ўғирлашда гумонланган, ноқонуний пойга уюштирган ўзбекистонликлар қўлга олингани ҳақида хабар берилган эди.
