Hormuz bo‘g‘ozidan o‘tish 60 kun davomida bepul bo‘ladi
60 kunlik muddatdan so‘ng Tehron navigatsiya va xavfsizlik xizmatlari uchun to‘lov joriy etishni rejalashtirmoqda.
Eron AQSh bilan davom etayotgan muzokaralar doirasida Hormuz bo‘g‘ozidan o‘tuvchi kemalar uchun 60 kunlik imtiyozli tartib joriy etishga rozi bo‘ldi. Bu davr mobaynida Tehron bo‘g‘oz orqali xavfsiz tranzit xizmatlari uchun to‘lov undirmaydi.
Bu haqda Fars axborot agentligi muzokaralar jarayonidan xabardor manbaga tayanib ma’lum qildi.
Qayd etilishicha, Eron va AQSh o‘rtasida ishlab chiqilgan o‘zaro anglashuv memorandumi yakuniy tahririda qator muhim o‘zgartirishlar kiritilgan. Hujjatda Eron va Ummonning Hormuz bo‘g‘ozidagi dengiz qatnovi kelajagini belgilashdagi o‘rni alohida qayd etilgan.
Shuningdek, bo‘g‘oz orqali harakatlanuvchi kemalardan xavfsizlik, navigatsiya va boshqa xizmatlar uchun to‘lov undirish huquqi Eron tomoni uchun tan olingani aytilmoqda.
Manbaga ko‘ra, kemalar uchun bepul tranzit rejimi faqat 60 kun amal qiladi. Ushbu muddat yakunlangach, Eron bo‘g‘ozdan foydalanayotgan tijorat kemalariga ko‘rsatiladigan xavfsizlik, navigatsiya, ekologik va sug‘urta xizmatlari uchun to‘lov joriy etishni rejalashtirmoqda.
Eslatib o'tamiz, avvalroq, AQSh va Eron harbiy harakatlarni to‘xtatish bo‘yicha kelishuvga erishgani haqida xabar berilgan edi.
