18 yoshli qizni aldab, Turkiyaga jo‘natayotgan jinoiy guruh ushlandi
Ular qizlarni yuqori daromadli ish va’dasi bilan aldab, xorijga jo‘natish bilan shug‘ullangan.
Farg‘ona viloyatida odam savdosi bilan bog‘liq jinoyatning oldi olindi. Bu haqda viloyat Ichki ishlar boshqarmasi ma’lum qildi.
Qayd etilishicha, IIBning uyushgan jinoyatchilikka qarshi kurashish boshqarmasi odam savdosiga qarshi kurash bo‘limi xodimlari tomonidan o‘tkazilgan tezkor tadbir davomida 18 yoshli qizni xorijga jo‘natishga uringan jinoiy guruh faoliyatiga chek qo‘yilgan.
Dastlabki ma’lumotlarga ko‘ra, avval Quva tumanida yashagan, hozirda Turkiyaning Denizli shahrida istiqomat qilayotgan ayol hamda uning Farg‘ona shahrida yashovchi sherigi oldindan til biriktirib, qizlarni xorijga jo‘natish bilan shug‘ullanib kelgan.
Ular Farg‘ona shahrida yashovchi 2008-yilda tug‘ilgan qizni Turkiyada yuqori daromadli ish va’dasi bilan aldab, xorijga olib chiqishga uringan. Qiz taklifga rozi bo‘lgan, biroq huquqni muhofaza qiluvchi organlar tomonidan o‘tkazilgan tezkor tadbir natijasida ushbu rejaga barham berilgan.
Mazkur holat yuzasidan Jinoyat kodeksining 135-moddasi (odam savdosi) bilan jinoyat ishi qo‘zg‘atilgan. Hozirda tergov harakatlari davom etmoqda.
Huquqni muhofaza qiluvchi organlar fuqarolarni xorijda yuqori daromad va’da qiluvchi shubhali takliflarga ishonmaslikka chaqirdi.
