Farg‘onada 125 mlrd so‘mlik sun’iy QQS orqali noqonuniy keshbek olish sxemasi aniqlandi

Farg‘ona viloyatida sun’iy QQS shakllantirish orqali noqonuniy keshbek olishga qaratilgan yirik firibgarlik sxemasi aniqlandi. Bu haqda viloyat soliq boshqarmasi xabar berdi.

 

Ma’lum qilinishicha, yashirin iqtisodiyotning oldini olish yuzasidan olib borilgan tezkor tahlillar davomida fuqaro T.Z. rahbarligidagi “E.F.F.” va “F.E.O.Z.” MChJlari tomonidan joriy yil may oyida Termiz shahrida ro‘yxatdan o‘tgan “T.B.S.E.” MChJdan jami 1,2 trillion so‘mlik un va sariyog‘ mahsulotlari xarid qilingani haqida elektron hisobvaraq-fakturalar rasmiylashtirilgani aniqlangan.

 

Soliq organlari korxonalarning QQS hisobotlari hamda ularning yuridik manzillaridagi omborlarni o‘rganganda, Farg‘onadagi korxonalarga amalda hech qanday mahsulot yetkazib berilmagani, shuningdek, tovarlar uchun biror so‘m ham pul o‘tkazilmagani ma’lum bo‘lgan.

 

Dastlabki xulosalarga ko‘ra, Termizdagi korxona Farg‘onadagi ikki MChJ uchun 125,4 milliard so‘mlik sun’iy QQS shakllantirishga uringan.

 

Tezkor choralar natijasida “E.F.F.” va “F.E.O.Z.” MChJlarning QQS guvohnomalari vaqtincha to‘xtatilib, aniqlashtirilgan QQS hisobotlari qabul qilindi hamda 125,4 milliard so‘mlik sun’iy QQS hisobdan chiqarildi.

 

Soliq boshqarmasi ma’lumotiga ko‘ra, mazkur sxema ijtimoiy tarmoqlar orqali soxta fiskal cheklarni sotish va ular asosida noqonuniy keshbek olish imkoniyatini yaratishga qaratilgan.

 

Holat yuzasidan to‘plangan materiallar qonuniy chora ko‘rish uchun huquqni muhofaza qiluvchi organlarga taqdim etilgan.

 

Soliq organlari fuqarolarni “Soliq” mobil ilovasida faqat o‘zlari amalga oshirgan xaridlar va foydalanilgan xizmatlar uchun berilgan haqiqiy fiskal cheklarni ro‘yxatdan o‘tkazishga chaqirdi.

 

Ijtimoiy tarmoqlar yoki boshqa shaxslar orqali tarqatilayotgan soxta cheklarni ro‘yxatdan o‘tkazish qonunchilikka zid ekani va buning uchun javobgarlik belgilanganligi eslatib o‘tildi.