Toshkentdagi mudhish YTHda ikki avtomobilni ham voyaga yetmaganlar boshqargani aniqlandi
YTH oqibatida bir ayol vafot etgan. Lacceti ikkiga bo‘linib ketgan.
Toshkent shahrida Lacetti va Kia K5 avtomobillari ishtirokida sodir bo‘lgan yo‘l-transport hodisasi oqibatida Lacetti avtomobili ikkiga bo‘linib ketgani haqida xabar berilgandi.
Aniqlanishicha, hodisa vaqtida har ikki avtomobilni ham voyaga yetmagan maktab o‘quvchilari boshqargan. Bu haqda Yo‘l harakati xavfsizligi boshqarmasi ma’lum qildi.
Qayd etilishicha, YTH oqibatida bir ayol halok bo‘lgan, uning farzandi esa onasiz qolgan.
Yo‘l harakati xavfsizligi boshqarmasi tomonidan e’lon qilingan videoda voyaga yetmaganlardan birining otasi o‘g‘li avtomobilni uxlab yotgan paytda olib chiqib ketganini aytgan.
“Uxlayotganimizda olib chiqib ketgan. Men o‘zim ham hayron bo‘ldim o‘sha kuni. O‘g‘lim shunaqa jinoyat ishini qildi. Bee’tibor bo‘lganim uchun endi men ham bunga sababchiman”, — deydi u.
Yana bir voyaga yetmaganning onasi esa farzandining avtomobil boshqarayotganidan bexabar bo‘lganini bildirgan.
“Bolamning mashina haydashini bilmasdim. Chunki biz biror marta qo‘liga kalit bermagan insonmiz-da. Mening o‘zimning shaxsiy mashinam bor, lekin unga o‘tirmagan”, — deydi u.
Ma’lumot o‘rnida, avvalroq O‘zbekistonda voyaga yetmaganlarning avtomobil boshqarishiga yo‘l qo‘ygan shaxslarga nisbatan javobgarlikni kuchaytirish rejalashtirilayotgani haqida xabar berilgandi.
