Andijonda 5 nafar egizak dunyoga keldi
Chaqaloqlarning uch nafari qiz, ikki nafari esa o‘g‘il bo‘lib, ona va bolalarning ahvoli yaxshi.
Andijonda 6-iyul kuni 5 nafar egizak dunyoga keldi. Bu haqda Sog‘liqni saqlash vazirligi xabar berdi.
Ma’lum qilinishicha, Andijon shahridagi "Qayrag‘ochtosh" mahalla fuqarolar yig‘inida yashovchi Nargiza Bekjonova 6-iyul kuni ko‘p homilalik tashxisi bilan Andijon shahar 2-son tug‘uruq majmuasiga yotqizilgan.
Unda muddatidan oldingi tug‘ruq tashxisi bilan kesarcha kesish amaliyoti o‘tkazilgan. Jarayon akusher-ginekologlar, neonatologlar va reanimatologlar ishtirokida muvaffaqiyatli amalga oshirilgan.
Ma’lum bo‘lishicha:
- birinchi chaqaloq: qiz, vazni 1450 gr;
- ikkinchi chaqaloq: o‘g‘il, vazni 1605 gr;
- uchinchi chaqaloq: qiz, vazni 1495 gr;
- to‘rtinchi chaqaloq: o‘g‘il, vazni 1585 gr;
- beshinchi chaqaloq: qiz, vazni 1205 gr.
Shundan so‘ng ona va chaqaloqlar ixtisoslashtirilgan tibbiy yordam ko‘rsatish maqsadida Respublika ixtisoslashtirilgan ona va bola salomatligi ilmiy-amaliy tibbiyot markazining Andijon viloyati filialiga o‘tkazildi.
Sog‘liqni saqlash vazirligi ma’lumotiga ko‘ra, ayni paytda ona va besh nafar chaqaloq shifokorlar nazorati ostida bo‘lib, ularning ahvoli yaxshi.
Eslatib, o'tamiz, may oyida ham Andijon viloyatida istiqomat qiluvchi ayol bir yo‘la 4 nafar egizak — uch nafari o‘g‘il va bir qizaloqni dunyoga keltirgandi.
