Rossiya xalqaro futbol o‘yinlariga qaytmaydi

 
FIFA va UEFA hozircha Rossiya terma jamoalari hamda klublarini xalqaro musobaqalarga qaytarish masalasini ko‘rib chiqmayapti. Bu haqda Ukraina futbol assotsiatsiyasi prezidenti Andrey Shevchenko UEFA prezidenti Aleksander Cheferin bilan uchrashuvdan so‘ng ma'lum qildi, deb yozmoqda The Telegraph nashri.

 
Shevchenkoning aytishicha, uchrashuv davomida Rossiya futbolining xalqaro maydonga qaytishi masalasi muhokama qilingan va UEFA rahbari bu borada tashkilot pozitsiyasi o‘zgarmaganini bildirgan.

 
"Men Aleksander Cheferin bilan gaplashdim. Hozir Rossiya jamoalarini xalqaro musobaqalarga qaytarish bo‘yicha hech qanday reja yo‘q", dedi Shevchenko.

 
Uning so‘zlariga ko‘ra, FIFA prezidenti Janni Infantino ham xuddi shunday pozitsiyani bildirgan.

 
Rossiya futboli 2022-yil fevral oyida Ukrainaga qarshi urush boshlanganidan so‘ng FIFA va UEFA tomonidan barcha xalqaro musobaqalardan chetlatilgan. Shundan buyon Rossiya terma jamoalari va klublari Jahon chempionati, Yevropa chempionati hamda UEFAning klub musobaqalarida ishtirok eta olmayapti.

 
So‘nggi kunlarda Rossiya futbolining xalqaro maydonga qaytishi haqidagi xabarlar yana muhokamalarga sabab bo‘ldi. Bunga Xalqaro olimpiya qo‘mitasi Rossiya Olimpiya qo‘mitasiga nisbatan ayrim cheklovlarni yumshatgani turtki bo‘ldi. Biroq XOQ qarori FIFA va UEFA uchun majburiy emas. Har bir xalqaro sport federatsiyasi bu borada mustaqil qaror qabul qiladi.

 
UEFA iyun oyida Rossiya terma jamoalari va klublari 2026/2027-yilgi mavsumda ham tashkilot tasarrufidagi musobaqalarda ishtirok etmasligini tasdiqlagan edi. Shuningdek, Aleksander Cheferin avvalroq Rossiya jamoalarining qaytishi urush tugamaguncha kun tartibida emasligini ta'kidlagan.

 
Shu bilan birga, FIFA XOQning so‘nggi qaroridan keyin vaziyatni tahlil qilishini ma'lum qilgan. Ammo hozircha Rossiya jamoalarining xalqaro futbol musobaqalariga qaytishi bo‘yicha rasmiy qaror qabul qilinmagan.