AQSh Hormuz bo‘g‘ozi masalasida Eronga yangi talablar qo‘ydi
Vashington Tehrondan Hormuz orqali o‘tuvchi kemalarga hujum qilinmasligini e’lon qilishni so‘radi.
AQSh ma’muriyati Erondan Hormuz bo‘g‘ozida xalqaro kemalar harakati xavfsizligini ta’minlash bo‘yicha rasmiy bayonot berishni talab qilmoqda. Bu haqda Reuters agentligi AQSh rasmiylariga tayanib xabar berdi.
Agentlik ma’lumotlariga ko‘ra, Vashington Tehrondan Hormuz bo‘g‘ozidagi barcha suv yo‘llari xalqaro kemalar uchun ochiq ekanini rasman e’lon qilishni hamda bo‘g‘oz orqali harakatlanayotgan kemalarga hujum qilinmasligini ochiq bayon etishni so‘ramoqda.
AQSh rasmiylaridan birining ta’kidlashicha, Vashington, shuningdek, Eronning Hormuz bo‘g‘ozi orqali o‘tuvchi kemalardan hech qanday to‘lov undirmasligini ham rasman ma’lum qilishini kutmoqda.
“Biz eronliklardan Hormuz bo‘g‘ozidagi barcha suv yo‘llari ochiq ekanini va endi kemalarga o‘q uzilmasligini ommaviy ravishda e’lon qilishlarini talab qilamiz”, — degan AQSh rasmiysi.
Axios xabariga ko‘ra, AQSh ushbu bayonot 11-iyul kuni e’lon qilinishiga umid qilmoqda.
Reuters qayd etishicha, AQSh rasmiylari so‘nggi kunlarda Vashington va Tehron o‘rtasida o‘tkazilgan muzokaralarni samarali deb baholamoqda. Shu bilan birga, tomonlar o‘rtasidagi muzokaralar davom etmoqda.
