AQSH Eronga yana zarba berdi, Hormuz bo‘g‘ozi yopildi
AQSH bir hafta ichida uchinchi bor Eron hududiga zarba berdi. Bunga Hormuz bo‘g‘ozidagi fuqarolik kemasiga uyushtirilgan hujum sabab qilib ko‘rsatildi.
AQSH Qurolli kuchlari Markaziy qo‘mondonligi (CENTCOM) 12-iyulga o‘tar kechasi Eron hududiga navbatdagi zarbalar seriyasini boshlaganini ma’lum qildi, deya xabar bermoqda Point.md.
CENTCOM bayonotiga ko‘ra, hujumlar Kipr bayrog‘i ostida Hormuz bo‘g‘ozi orqali harakatlangan GFS Galaxy konteyner kemasiga Eron Islom inqilobi qo‘riqchilari korpusi (KSIQ) tomonidan uyushtirilgan hujumga javoban amalga oshirilgan. AQSH harbiylari ma’lumotiga ko‘ra, kema ekipajining bir a’zosi bedarak yo‘qolgan, bortdagi yong‘in va mashina bo‘limiga yetgan jiddiy zarar sabab kema safarini davom ettira olmayapti.
Eronning Press TV telekanali esa Tehronda havo hujumidan mudofaa tizimlari ishga tushgani, shuningdek, Sirik, Konarak, Chobahor, Jask va Bandar-Abbos shaharlarida portlashlar ovozi eshitilgani haqida xabar berdi.
AQSH mudofaa vaziri Pit Hegset Eron "noto‘g‘ri tanlov qilgani" va buning oqibatlari uchun javob berayotganini ta’kidladi.
Shu bilan birga, KSIQ Hormuz bo‘g‘ozida harakatlangan kemaga ogohlantiruvchi o‘q uzilganini, bunga kema Eron belgilagan yo‘nalish bo‘ylab harakatlanmagani sabab bo‘lganini bildirdi. Eron tomoni Hormuz bo‘g‘ozi AQSHning mintaqadagi harbiy harakatlari to‘xtatilmaguncha yopiq qolishini ma’lum qildi hamda zarbalar davom etsa, Yaqin Sharqdagi AQSH harbiy bazalariga yangi hujumlar uyushtirilishi mumkinligi haqida ogohlantirdi.
Ma’lumot uchun, 17-iyun kuni AQSH va Eron harbiy harakatlarni to‘xtatish hamda Hormuz bo‘g‘ozini qayta ochishni nazarda tutuvchi doiraviy kelishuvni imzolagandi. Biroq 25-iyun kuni bo‘g‘ozdagi fuqarolik tankeriga uyushtirilgan hujumdan so‘ng tomonlar o‘rtasidagi keskinlik yana kuchaydi. 8-iyul kuni AQSH prezidenti Donald Tramp Eron bilan tuzilgan memorandum endi amal qilmasligini ma’lum qilgan edi.
