Eron oliy rahbari urush tugamaguncha omma oldida ko‘rinish bermaydi — TASS
Qaror xavfsizlik bilan bog‘liq bo‘lib, mamlakatdagi vaziyat barqarorlashgach Mujtabo Xomanaiyning jamoatchilik oldida chiqish qilishi kutilmoqda.
Eronning oliy rahbari Mujtabo Xomanaiy AQSH va Isroil bilan urush yakunlanib, mamlakatdagi xavfsizlik vaziyati barqarorlashmaguncha omma oldida chiqish qilmaydi. Bu haqda TASS agentligi eronlik manbaga tayanib xabar berdi.
Nashr manbasining aytishicha, bunday qaror xavfsizlik nuqtayi nazaridan qabul qilingan.
"Hukumat vaziyat barqarorlashishini kutmoqda. Shundan keyin oliy rahbar jamoatchilik oldida chiqish qiladi", — deya ma’lum qilgan manba.
Qayd etilishicha, Xomanaiyning xorijiy davlat rahbari bilan ilk aloqasi Rossiya prezidenti Vladimir Putin bilan telefon orqali muloqot yoki shaxsiy uchrashuv shaklida bo‘lishi mumkin.
AQSH va Isroil 28-fevral kuni Eronga qarshi harbiy amaliyot boshlagan. Havo hujumlari oqibatida Eronning avvalgi oliy rahbari Oyatulloh Ali Xomanaiy hamda mamlakatning yana bir qator yuqori martabali rahbarlari halok bo‘lgan.
Iyun oyida Vashington va Tehron barcha frontlarda, jumladan Livanda ham o‘t ochishni to‘xtatishni nazarda tutuvchi anglashuv memorandumini imzolagan. Shundan so‘ng tomonlar Shveysariyaning Byurgenshtok hududida Qatar va Pokiston vositachiligida muzokaralar o‘tkazgan.
Biroq 8-iyul kuni AQSH Tehronni avvalgi kelishuvlarni, xususan, Hormuz bo‘g‘ozi bo‘yicha majburiyatlarni buzganlikda ayblab, Eronga nisbatan keng ko‘lamli havo hujumlarini qayta boshlagan.
13-iyul kuni Eron Tashqi ishlar vazirligi matbuot kotibi Ismoil Bag‘oiy Tehron memorandum shartlarini buzmaganini, uning bajarilmay qolishi uchun mas’uliyat AQSH zimmasida ekanini ma’lum qilgan.
