Tadbirkorlar uchun jarimalar va to‘lovlar kamaytirilishi mumkin
Prezident Shavkat Mirziyoyev nazorat qiluvchi organlarga tadbirkorlarga kamchiliklarni bartaraf etishga ko‘maklashish zarurligini ta’kidlab, jarimalar, to‘lovlar va yig‘imlarni qisqartirish bo‘yicha topshiriq berdi.
O‘zbekistondagi 51 ta vazirlik va idora 322 ta yo‘nalish bo‘yicha moliyaviy jarima qo‘llash vakolatiga ega. 2024–2026-yillarda ushbu vakolatlar doirasida qariyb 3 trillion so‘mlik jarima qo‘llangan. Bu haqda 21-iyul kuni Prezident Shavkat Mirziyoyev raisligida o‘tkazilgan videoselektor yig‘ilishida ma’lum qilindi.
Yig‘ilishda davlat rahbari nazorat va jazo qo‘llovchi tashkilotlar rahbarlarining yondashuvi o‘zgarishi zarurligini ta’kidladi. Uning so‘zlariga ko‘ra, tadbirkorni jazolashdan avval unga kamchiliklarni bartaraf etish imkoniyati berilishi va to‘g‘ri yo‘l ko‘rsatilishi kerak.
Shuningdek, tashqi bozorlarda raqobat kuchayib borayotgan bir paytda ishlab chiqaruvchilar va eksportchilar zimmasidagi to‘lov hamda yig‘imlarni kamaytirish masalasi ham muhokama qilindi.
Qayd etilishicha, bir fura gilosni eksport qilishda bojxona yig‘imi, fumigatsiya, sertifikatlashtirish va deklarant xizmatlari uchun 5 million so‘mgacha qo‘shimcha xarajat yuzaga kelmoqda.
Yig‘ilish yakunida barcha vazirlar va tarmoq rahbarlariga bir hafta muddatda o‘z tizimlaridagi byurokratik tartib-taomillarni, jarimalar, to‘lovlar va yig‘imlarni keskin qisqartirish hamda biznes muhitini yaxshilash bo‘yicha takliflarni Prezident administratsiyasiga kiritish topshirildi.
