AQSHning Eron bilan urush xarajatlari 37,5 milliard dollarga yetdi
Mojaro davomida AQSHning 18 nafar harbiy xizmatchisi halok bo‘lgan, 430 nafarga yaqini yaralangan.
AQSH Mudofaa vaziri Pit Hegsetning ma'lum qilishicha, Eron bilan davom etayotgan urush mamlakatga hozirgacha 37,5 milliard dollarga tushgan. Bu Pentagon e'lon qilgan avvalgi hisob-kitobdan qariyb 8 milliard dollarga ko‘pdir. Bu haqda Reuters xabar berdi.
Hegset bu raqamni Senatning mablag‘ ajratish qo‘mitasidagi eshituvda e'lon qilgan. Uning aytishicha, hisob-kitobga urush boshlanganidan buyon qilingan xarajatlar hamda 30-sentabrgacha rejalashtirilgan harbiy xarajatlar kiritilgan.
Shu bilan birga, Tramp ma'muriyati Kongressdan Eron bilan bog‘liq harbiy amaliyotlarni davom ettirish uchun qo‘shimcha 90 milliard dollar atrofida mablag‘ ajratishni so‘ragan. Pentagon rahbariyati bu mablag‘ harbiy tayyorgarlikni saqlash, qurol-yarog‘ zaxiralarini to‘ldirish va amaliyotlarni davom ettirish uchun zarurligini bildirgan.
Senatdagi eshituv davomida ayrim qonunchilar urush xarajatlari va harbiy strategiya yuzasidan ma'muriyatni tanqid qilgan. Ular mojaro qancha davom etishi va qo‘shimcha mablag‘lar qanday sarflanishi haqida batafsil ma'lumot talab qilgan.
AQSH va Eron o‘rtasidagi sulh shu oy boshida buzilganidan beri tomonlar har kuni o‘zaro zarbalar almashmoqda. Pentagon ma'lumotiga ko‘ra, mojaro davomida AQSHning 18 nafar harbiy xizmatchisi halok bo‘lgan, 430 nafarga yaqini yaralangan.
