“Tehron muzokaralarga jiddiy yondashmayapti” – Rubio
Hormuz bo‘g‘ozidagi keskin sabab energetika bozorida xavotirlar kuchaygan.
AQSH davlat kotibi Marko Rubio Vashington Eron bilan inqirozni diplomatik yo‘l bilan hal etish bo‘yicha muzokaralarga hamon tayyorligini, biroq Tehron hozircha bunga jiddiy yondashmayotganini ma’lum qildi. U bu bayonotni Filippin poytaxti Manilada ASEAN tashqi ishlar vazirlari yig‘ilishi chog‘ida berdi.
Rubioning aytishicha, AQSH har doim diplomatiyani ustuvor deb bilgan, ammo Eron muzokaralarni cho‘zishga urinayotgani va amaliy qadamlar tashlamayotgani kuzatilmoqda. Uning fikricha, muzokaralar muvaffaqiyatli bo‘lishi uchun har ikki tomon birdek manfaatdor bo‘lishi kerak.
Davlat kotibi, shuningdek, Eronning Hormuz bo‘g‘ozi ustidan nazorat o‘rnatish va xalqaro kemalardan to‘lov undirish rejalari "nihoyatda xavfli pretsedent" yaratishini ta’kidladi. Uning so‘zlariga ko‘ra, agar bunday amaliyotga yo‘l qo‘yilsa, boshqa davlatlar ham xalqaro dengiz yo‘llariga nisbatan shunday da’volarni ilgari surishi mumkin, bu esa global savdo va energetika xavfsizligiga jiddiy tahdid tug‘diradi.
AQSH va Eron o‘rtasidagi harbiy keskinlik tufayli ayni damda Qizil dengiz orqali neft tashish yana izdan chiqqan, bir nechta Saudiya neft tankerlari xavfsizlik sabab yo‘nalishini o‘zgartirgan. Bu esa jahon energiya bozorlarida yangi xavotirlarni kuchaytirgan.
