Kelishuv bo‘lmasa, yo‘qotishlar yanada kuchayadi — Rubio
AQSh Davlat kotibining aytishicha, Tehron AQSh bilan kelishuvga erishmaguncha iqtisodiy va harbiy yo‘qotishlari ortishda davom etadi.
AQSh Davlat kotibi Marko Rubio Eron AQSh bilan kelishuvga erishmaguncha mamlakat ko‘rayotgan zarar kun sayin ortib borishini ma’lum qildi.
Rubio bu haqda ASEAN sammiti doirasida o‘tkazilgan matbuot anjumanida so‘zga chiqib, Eron bitimlarni imzolagach ularni buzishi yoki shartlarni o‘zgartirishga urinayotganini ta’kidladi.
"Bitimlar shunday ishlamaydi. Endi ular buning narxini to‘lamoqda. Agar yaqin kunlarda ham fikrlarini o‘zgartirmasa, ulkan zarar ko‘rishda davom etadi", — dedi AQSh Davlat kotibi.
Uning so‘zlariga ko‘ra, Tehron tashqi tomondan qat’iyatli ko‘rinishga urinayotgan bo‘lsa-da, amalda allaqachon jiddiy yo‘qotishlarga duch kelgan va buning uchun katta narx to‘lamoqda.
Eslatib o‘tamiz, 8-iyul kuni AQSh va Eron o‘rtasida harbiy keskinlik yana kuchaydi. Vashington Tehronni Hormuz bo‘g‘ozida tankerlarni o‘qqa tutganlikda ayblab, sulhni bekor qilganini e’lon qilgan. Shundan so‘ng AQSh Eron hududiga zarbalar berishni davom ettirgan bo‘lsa, Eron ham bunga javoban mintaqadagi AQSh harbiy bazalariga hujumlar uyushtirmoqda.
