AQSHning Eronga quruqlikdan bostirib kirish ehtimoli yuqori — Pokiston razvedkasi
Harbiy ekspertlar esa bunday ssenariy AQSH uchun katta yo‘qotishlarga olib kelishi mumkinligini bildirdi.
BILD nashrining xabar berishicha, Pokiston maxsus xizmatlari AQSHning Eronga cheklangan quruqlik operatsiyasini boshlashi ehtimolini tobora yuqori baholamoqda.
Islomoboddagi xavfsizlik doiralaridagi manbalarga ko‘ra, Donald Tramp o‘z harbiy qo‘mondonligining ogohlantirishlariga qaramay, Eronning sohilbo‘yi hududlariga qo‘shin kiritish haqida buyruq berishi mumkin.
Harbiy ekspertlar bunday operatsiya AQSH uchun nihoyatda murakkab kechishini ta’kidlamoqda. Ularning fikricha, desant kuchlari raketa va dronlarning ommaviy hujumlariga duch keladi, Eronning tog‘li hududlari va jazirama cho‘llari esa qo‘shinlarning harakatlanishini keskin qiyinlashtiradi.
AQSH Harbiy-dengiz instituti tahlilida Eron “tabiiy qal’a” deb baholanadi. Tahlilda qayd etilishicha, mamlakatning murakkab geografik sharoiti har qanday quruqlik operatsiyasini deyarli amalga oshirib bo‘lmaydigan darajada qiyinlashtiradi. Institut mutaxassislari harbiy texnikaning tez ishdan chiqishi ham operatsiya muvaffaqiyatiga jiddiy putur yetkazishini ta’kidlagan.
Nashr ma’lumotiga ko‘ra, Eron ixtiyorida qariyb 610 ming nafar amaldagi harbiy xizmatchi va harbiylashtirilgan tuzilmalar jangchilari, shuningdek, 350 ming nafar zaxiradagi harbiy mavjud. Shu bois ehtimoliy quruqlik operatsiyasi AQSH uchun natijasi oldindan noma’lum bo‘lgan og‘ir harbiy sinovga aylanishi mumkin.
Maqolada qayd etilishicha, bunday qaror Donald Tramp uchun ichki siyosiy bosimni ham kuchaytiradi. Reuters agentligi buyurtmasi bilan Ipsos o‘tkazgan so‘rov natijalariga ko‘ra, amerikaliklarning atigi uchdan bir qismi Eronga qarshi harbiy operatsiyani qo‘llab-quvvatlaydi. Respondentlarning 69 foizi esa Tramp harbiy aralashuv maqsadlarini yetarlicha izohlamagan, deb hisoblaydi.
