Xitoy Eronga havo hujumidan mudofaa tizimini yetkazib berishi mumkin
Eron urush davomida zaiflashgan havo mudofaasini tiklash maqsadida Xitoydan yuzlab ko‘chma zenit-raketa majmualarini qabul qilish arafasida.
Eron yaqin haftalarda Xitoyda ishlab chiqarilgan 400 tagacha ko‘chma havo hujumidan mudofaa raketa tizimlarining ilk partiyasini qabul qilishi kutilmoqda. Yetkazib berilishi rejalashtirilayotgan tizimlar orasida QW-12 va FN-16 rusumlari borligi aytilmoqda. Bitim qiymati 60–70 million dollar atrofida baholanmoqda.
Ushbu qurollar Eronning qisqa masofali havo mudofaasi imkoniyatlarini tiklashga xizmat qiladi. AQSH va Isroil bilan yuz bergan so‘nggi harbiy to‘qnashuvlar davomida Eronning bir qator havo mudofaa obyektlari zarba ostida qolgan edi. Yetkazib beriladigan ushbu raketa majmualari past balandlikda uchuvchi samolyot, vertolyot va dronlarga qarshi samarali vosita hisoblanadi.
Qurol-yarog‘ni yetkazib berish bo‘yicha kelishuv Gonkongda ro‘yxatdan o‘tgan Zhongqing Baoshang International Investment kompaniyasi orqali amalga oshirilmoqda. Shu bilan birga, yukni Eronga qaysi yo‘nalish orqali yetkazish masalasi hamon muhokama qilinayotgani, havo va quruqlik yo‘llari ko‘rib chiqilayotgani aytilmoqda. Xitoy rasmiylari bu boradagi ma’lumotlarni rad etgan, Pokiston esa yuk tranzitiga aloqadorligi haqidagi taxminlarni inkor qilgan.
Harbiy tahlilchilarning fikricha, ko‘chma zenit-raketa majmualari Eronning strategik havo mudofaa tizimlari o‘rnini bosa olmaydi, biroq harbiy bazalar, muhim infratuzilma obyektlari va qo‘shinlarni past balandlikdan amalga oshiriladigan hujumlardan himoya qilish imkoniyatini sezilarli darajada oshiradi. Bunday tizimlarning mobil xarakterga egaligi ularni aniqlash va yo‘q qilishni ham murakkablashtiradi.
