Eron Hormuz bo‘g‘ozini ochish uchun AQSHdan kompensatsiya talab qilmoqda
Tehron va Oman bo‘g‘oz orqali vaqtinchalik kemalar qatnovini yo‘lga qo‘yish masalasini muhokama qilmoqda.
Eron Hormuz bo‘g‘ozi orqali dengiz qatnovini qayta yo‘lga qo‘yish uchun AQSHdan kompensatsiya talab qilmoqda. Bu haqda Point.md xabar berdi.
Eron tashqi ishlar vaziri Abbos Aroqchining so‘zlariga ko‘ra, Eron Oman bilan Hormuz bo‘g‘ozi orqali kemalar qatnoviga oid kelishuv tuzishga yaqin. Biroq bu kelishuv suv yo‘lining to‘liq ochilishini anglatmaydi. Aroqchi Eron AQSHdan tinchlik kelishuvini buzganlik uchun kompensatsiya kutayotganini bildirdi.
Ayni paytda Eron va Oman Hormuz bo‘g‘ozi orqali kemalar harakati uchun vaqtinchalik yo‘nalish tafsilotlarini muhokama qilmoqda. Taklif etilayotgan tartibga ko‘ra, tijoriy kemalar bo‘g‘ozga Eron hududiy suvlari orqali kirib, Oman hududiy suvlari orqali chiqadi.
Eron Tashqi ishlar vazirligi ma’lumotiga ko‘ra, ushbu vaqtinchalik yo‘nalish ikki oydan to‘rt oygacha amal qilishi mumkin. Zarurat tug‘ilsa, uning amal qilish muddati uzaytiriladi.
Islom inqilobi qo‘riqchilari korpusi vakili Husayn Mohebbi esa Hormuz bo‘g‘ozi nafaqat iqtisodiy va dengiz yo‘li, balki mamlakatning geosiyosiy ustunligi ramzi ekanini ta’kidladi.
