Rossiyada terakt rejalashtirgan va Suriyaga ketmoqchi bo‘lgan surxondaryolik 4 yigit qamaldi
Tergovda ularning aqidaparastlik g‘oyalarini targ‘ib qiluvchi materiallarni tarqatgani va yangi a’zolarni guruhga jalb qilgani aniqlangan.
Sariosiyo tumanida terroristik tashkilotlar g‘oyalarini targ‘ib qilgan, yashirin guruh tuzib, qo‘poruvchilik va boshqa jinoiy harakatlarni rejalashtirgan shaxslar sudlandi. Bu haqda DXX xabar berdi.
Ma’lum qilinishicha, 2003-yilda tug‘ilgan Sariosiyo tumani fuqarosi 2023-yilda ishlash maqsadida Rossiyaning Mahachqal’a shahriga borgan. U yerda “Muhammad” laqabli mahalladoshi bilan ijtimoiy tarmoqlar orqali aqidaparastlik g‘oyalarini targ‘ib qiluvchi videolarni ko‘rib, yashirin guruh tuzgan.
Keyinchalik ular guruh safiga 2005-yilda tug‘ilgan yana bir yigitni jalb qilgan. Guruh a’zolari Suriyaga borishni rejalashtirgan. Buning uchun ulardan biri oila a’zolarining pul mablag‘larini ruxsatsiz olib chiqqan.
Ular Moskva—Istanbul yo‘nalishi orqali Turkiyaga, undan keyin Suriyaga o‘tishni mo‘ljallagan. Biroq Moskva shahriga yetib borgach, guruh a’zolari o‘rtasida kelishmovchilik yuzaga kelgan va ikki nafari O‘zbekistonga qaytgan.
“Muhammad” esa Qozon shahrida qotillik sodir etgani uchun Rossiya qonunchiligiga asosan javobgarlikka tortilgan.
Guruhning 2005-yilda tug‘ilgan a’zosi O‘zbekistonga deportatsiya qilingan. U sud hukmi bilan 7 yilga ozodlikdan mahrum etilgan. Shunga qaramay, guruhning qolgan a’zolari faoliyatini davom ettirgan. 1999 va 2001-yillarda tug‘ilgan yana ikki nafar Sariosiyo tumani fuqarosi guruhga qo‘shilgan.
Ular terroristik tashkilotlar g‘oyalarini targ‘ib qilgan hamda Rossiyaning Mahachqal’a shahrida huquq-tartibot xodimlariga qarshi jinoiy harakatlarni amalga oshirishni rejalashtirgan.
Bundan tashqari, guruh a’zolari Sariosiyo tumanida yashovchi 2004-yilda tug‘ilgan yana bir fuqaroni o‘z safiga jalb qilgan. Tergov jarayonida guruh a’zolarining jinoyatlari dalillar bilan o‘z tasdig‘ini topgan.
Jinoyat ishlari bo‘yicha Sariosiyo tuman sudi hukmiga ko‘ra, to‘rt nafar shaxs Jinoyat kodeksining tegishli moddalarida nazarda tutilgan jinoyatlarni sodir etganlikda aybli deb topilgan.
Sud hukmi bilan ularning har biriga 8 yil 6 oy muddatga ozodlikdan mahrum qilish jazosi tayinlangan.
