Farg‘onadagi qotillik: buvisini o‘ldirgan yigit 17 yilga qamaldi

Farg‘ona viloyati Bag‘dod tumanida buvisining uyiga pul va qimmatbaho buyumlarni o‘g‘irlash uchun kirgan yigit va sherigi qamaldi.

 

Ma’lum bo‘lishicha, marhuma ko‘p qavatli uyda yolg‘iz yashagan. U foiz evaziga pul bergan va uyida katta miqdorda mablag‘ borligidan nabirasi xabardor bo‘lgan. Avval o‘g‘rilik uchun ikki marta sudlangan yigit bu pullarni o‘g‘irlashni rejalashtirgan.

 

U jinoyatdan ikki kun oldin Toshkentda ishlayotgan tengdoshini Bag‘dodga chaqirgan. Sherigi kelgach, ular marhumaning uyiga borib, vaziyatni kuzatgan. Biroq atrofda odamlar ko‘pligi sabab rejani o‘sha kuni amalga oshirmagan.

 

Ertasi kuni ular yana xonadonga borgan. Bu safar uyda hech kim bo‘lmagan. Yigitlar ichkariga kirib, pul va qimmatbaho buyumlarni qidira boshlagan. Shu payt marhuma uyiga qaytib kelgan va ularga qarshilik ko‘rsatgan.

 

Nabirasi yonida olib kelgan oshxona pichog‘i bilan buvisining ko‘krak qismiga zarba bergan. Ayol og‘ir jarohat olib, hushidan ketgan. Yigitlar esa xonadondan tilla zanjir, zirak, avtomobil monitori va 2 million so‘m pulni olib chiqib ketgan.

 

Shundan so‘ng yigit jinoyat izlarini yashirishga uringan. U yoqilg‘i quyish shoxobchasidan 10 litr benzin sotib olib, uy yaqiniga yashirgan. Kechasi esa xonadonga qaytib, benzinni uyning turli joylari va buvisining jasadiga sepib, o‘t qo‘ygan. Keyin eshikni qulflab, voqea joyidan ketgan.

 

Jinoyat ishlari bo‘yicha Buvayda tuman sudida ko‘rib chiqilgan ish yakunida yigit Jinoyat kodeksining 97-moddasi 2-qismi “p” bandi, 169-moddasi 2-qismi “g” bandi va 173-moddasi 2-qismi “b” bandida ko‘rsatilgan jinoyatlarni sodir etganlikda aybli deb topilgan. Unga 17 yil ozodlikdan mahrum qilish jazosi tayinlangan.

 

Uning sherigi esa Jinoyat kodeksining 97-moddasi 2-qismi “p” bandi va 169-moddasi 2-qismi “g” bandida ko‘rsatilgan jinoyatlarni sodir etganlikda aybli deb topilib, 16 yilga ozodlikdan mahrum qilingan.