Latviya O‘zbekiston fuqarolariga viza berishni to‘xtatmaydi — TIV

 

Latviya Ichki ishlar vazirligi O‘zbekiston fuqarolariga vizalar berishni ma’lum muddatga to‘xtatishni taklif qilgani haqida xabarlar tarqalgandi.

 

O‘zbekiston Tashqi ishlar vazirligi ushbu masala yuzasidan Latviya tomoni bilan muzokaralar o‘tkazdi. Bu haqda TIV matbuot kotibi Omonulla Fayziyev Zamon.uz’ga ma’lum qildi.

 

Xabarlar e’lon qilinganidan so‘ng O‘zbekiston TIV tomonidan tegishli diplomatik choralar ko‘rilgan.

 

Jumladan, O‘zbekistonning Rigadagi elchixonasi tomonidan Latviya Bosh vaziri ofisi rahbariyati, Tashqi ishlar va Iqtisodiyot vazirliklari, Prezident Administratsiyasi vakillari bilan qator uchrashuv va muzokaralar o‘tkazilgan. Shuningdek, TIV Konsullik-huquqiy departamenti Latviya elchixonasi bilan ham muloqot olib borgan.

 

Muzokaralar davomida Latviya tomoniga taklif etilayotgan choralar ikki tomonlama munosabatlarga ko‘rsatishi mumkin bo‘lgan ta’sir yuzasidan O‘zbekistonning pozitsiyasi yetkazilgan.

 

Ko‘rilgan choralar natijasida Latviya tomoni amaldagi tartibga o‘zgartirish kiritishga ehtiyoj yo‘qligini bildirgan.

 

O‘zbekiston TIVi Latviya bilan shakllangan do‘stona va o‘zaro manfaatli munosabatlarni yuksak qadrlashini ta’kidladi. Latviya O‘zbekistonning Yevropa Ittifoqidagi muhim hamkorlaridan biri bo‘lib, ikki davlat o‘rtasidagi siyosiy, savdo-iqtisodiy, madaniy-gumanitar, migratsiya va boshqa sohalardagi aloqalar izchil rivojlanmoqda.

 

Shu bilan birga, TIV xorijda bo‘lib turgan yoki xorijga chiqishni rejalashtirayotgan O‘zbekiston fuqarolarini mamlakat qonunchiligiga qat’iy rioya qilishga, milliy urf-odat va an’analarni hurmat qilishga hamda o‘z xatti-harakatlariga mas’uliyat bilan yondashishga chaqirdi.

 

Vazirlik ayrim shaxslarning qonunbuzarlikka yo‘l qo‘yishi nafaqat ularning o‘ziga, balki xorijda qonuniy asosda o‘qib, ishlayotgan, sayohat yoki istiqomat qilayotgan boshqa O‘zbekiston fuqarolariga ham salbiy ta’sir ko‘rsatishi mumkinligini qayd etdi.