JAVOB.
Mehnat shartnomasini bekor qilish ishga qabul qilish huquqiga ega bo‘lgan shaxslar tomonidan amalga oshiriladi va buyruq bilan rasmiylashtiriladi.
Mehnat kodeksi. 107-modda.
Amaliyotchi yurist Saidali Muxtoraliyevning taʼkidlashicha, tuman hokimi bu tumanda joylashgan umumtaʼlim maktablari direktorlari va ushbu maktab xodimlari uchun ish beruvchi maqomiga ega emas. Shu sababli, hokimlar maktab direktorlari bilan tuzilgan mehnat shartnomasini bekor qilish yuzasidan tashabbus bildirishga (MK 100-modda bo‘yicha) yoki ulardan mehnat shartnomasini bekor qilinishi yuzasidan ariza talab qilishga (MK 99-modda bo‘yicha) haqli emaslar.
“Bundan tashqari, Prezidentning 2020 yil 6-noyabrdagi PF-6108-sonli Farmoni 11-bandiga muvofiq, 2021 yil 1 yanvardan boshlab umumtaʼlim muassasalari direktorlarini lavozimga tayinlash hamda ish beruvchining tashabbusiga ko‘ra lavozimidan ozod etish Qoraqalpog‘iston Respublikasi Xalq taʼlimi vazirligi, viloyatlar boshqarmalari va Toshkent shahar bosh boshqarmasi tomonidan tegishli xalq deputatlari tuman (shahar) Kengashlari bilan kelishilgan holda amalga oshirilishi belgilangan”, - deydi mutaxassis.
Yuristning aytishicha, agar hokim maktab direktorini ishdan bo‘shatilib yuboradigan bo‘lsa, Prezidentning mazkur Farmoni talablarini ham qo‘pol ravishda buzgan bo‘lib chiqadi. Sababi, agar maktab direktori biror-bir qonunni yoki intizomni buzadigan bo‘lsa, mehnat shartnomasini bekor qilish xalq deputatlari kengashi bilan kelishilgandan keyin bo‘ladi. Ana shu bosqichdagina, “hokimbuva” masalaga kengash raisi sifatida aralashishi mumkin. Qolgan vaziyatlarda maktab direktorini ishdan bo‘shatish masalasini hal qilish bo‘yicha hech qanday vakolatga ega emas.
“Hokimlarda maktab direktorini ishdan bo‘shatish tashabbusi bo‘lmaydi, bu huquq faqatgina hududiy xalq taʼlimi boshqarma rahbarlariga berilgan”.
Shundan kelib chiqilsa, agar hokim mana shunday o‘zboshimchalik bilan ish tutadigan bo‘lsa, maktab direktorining mehnat huquqlarini poymol qilgan bo‘ladi. Chunki bu noqonuniy hisoblanadi.
“Agar, gap qaysi tuman hokimi va qaysi maktab direktori haqida ketayotganligini bildirsangiz, bu maʼlumotni Xalq taʼlimi vazirligiga va mehnatni nazorat qilish organlariga yuboramiz. Aytganlaringiz haqiqat bo‘lsa, direktorning huquqlari albatta tiklanadi”, - deydi yurist.
Avvalroq, agar ijaraga oluvchi vafot etsa, uning yaqinlari marhumning qarziga “merosxo‘r” bo‘lmasligi haqida yurist javobi havola qilingandi.
Olamgir Abdiyev