“Қуш сотаман, оласизми?”

Ижтимоий тармоқларда “Тошқирғий полапонини сотаман” мавзусида эълон тарқалди. Қорақалпоғистон Республикаси Хўжайли тумани “Узумзор” МФЙда яшовчи фуқаро Б.А. тошқирғий полапонини сотмоқчи бўлган вақтида Қорақалпоғистон Республикаси Экология қўмитасининг тезкор гуруҳи томонидан тўхтатилди. Фуқаро Б.Адан ушбу тошқирғий полапони қандай қилиб сақлаб қолгани сўралганда, 2021 йил 5 июль куни Қорақалпоғистон Республикаси Хўжайли тумани ҳудудидан, табиат қўйнидан ушлаб олганлигини ва шу кунга қадар ўз уйида сақлаётганлигини айтган.

Шунингдек, ушбу қуш “Қизил китоб”га киритилган уч ойлик тошқирғий полапони эканлиги ва уни ушлаб олгани тўғрисида фуқаро Б.А. Давлат экология қўмитаси Қорақалпоғистон Республикаси назорат инспекциясига хабар қилмаганлиги, қуш тор темир панжарали қафасга солиниб сақланаётганлиги аниқланган.

Шунга ўхшаш ҳолат Самарқандда ҳам кузатилди. 2021 йил 14 июль куни Самарқанд шаҳар Экология ва атроф-муҳитни муҳофаза қилиш назорат инспекцияси давлат инспекторлари томонидан Самарқанд шаҳрида олиб борилган кузатув рейд тадбирлари жараёнида ҳам, Самарқанд шаҳри “Мўлиён” МФЙда яшовчи фуқаро И.А “Қизил китоб”га киритилган тўрт дона Ўрта Осиё тошқирғийи полапонларининг ноқонуний савдоси билан шуғулланаётганлиги аниқланди.

Мутасаддиларнинг Zamon.uz’га маълум қилишларича, айни вақтда тошқирғий полапони ветеринар кўригидан ўтказилмоқда.

Ушбу ҳолат юзасидан қонунбузар фуқароларга нисбатан Ўзбекистон Республикаси “Маъмурий жавобгарлик тўғрисида”ги Кодекснинг тегишли моддаси билан маъмурий чора кўрилди.

Олдинроқ, Бухоро шаҳрида ҳам “Қизил китоб”га киритилган қуш савдосининг олди олинганлиги ва табиатга қўйиб юборилганлиги ҳақида хабар берган эдик.