Булунғурда маст эркак амакисини кетмон билан жароҳатлаб, ўлдирди
Самарқанд вилоятининг Булунғур туманида маст фуқаро амакисини кетмон билан уриб, унинг бевақт ўлимига сабабчи бўлди.
30 ёшли Б.О. жиянининг туғилган кунида спиртли ичимлик ичиб, маст ҳолда тунги соат 03:00 атрофида амакиси Н.А.нинг уйига борган ва жанжал чиқарган. Таъкидланишича, Б.О. уни тинчлантирмоқчи бўлган амакисини калтаклаб, кетмон билан бошига уриб, ўлдирган.
Белгиланган суд-тиббий экспертизасининг хулосасида А.Н.нинг ўлимига танасида оғир тан жароҳат белгилари мавжудлиги сабаб бўлгани айтилган. Суд томонидан 30 ёшли Б.О.га нисбатан Жиноят кодексининг 97-моддаси (қасддан одам ўлдириш) 2-қисми билан тўғри малакаланган деб топилди.
Эслатиб ўтамиз, аввалроқ Қизириқ туманида сув талашиб, ўзаро жанжал оқибатида фуқаро қўшнисини кетмон билан ургани ҳамда Навоийда ука акасини кетмон билан уриб, ўлдириб қўйгани ҳақида хабар берилганди.
Баҳринисо Мадумарова тайёрлади.
