Тошкентдаги ядро университетига директор тайинланди
Шавкат Абдукомилов "ММФИ" Миллий тадқиқот ядро университетининг Тошкент шаҳридаги филиалининг ижрочи директори вазифасини бажарувчи этиб тайинланди. Бу ҳақда "Uzatom" агентлиги хабар берди.
Қайд этилишича, шу кунгача техника фанлари номзоди Ш.Абдукомилов "Ўзатом" агентлигининг "Илм-фан, инновация ва кадрларни тайёрлаш" бошқармаси бошлиғи лавозимида фаолият юритиб келаётган эди.
Эслатиб ўтамиз, ММФИ МТЯУ Тошкент шаҳридаги филиали ўз фаолиятини 2019 йилнинг 3 сентябрь куни бошлаган бўлиб, бугунги кунда филиалда бакалаврлар кундузги таълим дастури асосида “Ядро энергетикаси ва иссиқлик физикаси”, “Ядро физикаси ва технологиялар”, “Иссиқлик энергияси ва иссиқлик физикаси” ва “Электр энергетикаси ва электротехника” таълим йўналишлари бўйича таҳсил берилмоқда.
Аввалроқ Энергетика вазирлиги бошқарма бошлиғи лавозимида ишлаб келган Беҳзод Нарматов «Ўзтрансгаз» бошқаруви раиси лавозимига тайинлангани ҳақида хабар берилганди.
