“Ўзбеклар нега ўз машинасини минолмаяпти?” Депутат Кушарбаев мавзуга эътибор қаратди
Ижтимоий тармоқларда тарқалган Қозоғистон телеканалларининг бирида Ўзбекистонда автомобиль олишдаги навбатлар ҳақида берилган лавҳа турли фикр-мулоҳазаларга сабаб бўлмоқда.
Унда, мамлакатимизда автомобиль олиш талабида бўлганлар 30 минг нафардан ошгани таъкидланар экан, автомобилга тўлов қилиб қўйган фуқаролар навбатини йиллаб кутаётган бир пайтда, компания қўшни Тожикистонда ўз диллерлик пунктини очгани, бу эса, халқнинг норозилигига сабаб бўлаётгани танқид қилинган. Шунингдек, журналист “Ўзбеклар нега ўз машинасини минолмаяпти?” — деган саволни ўртага ташлаган.
Кўпчиликнинг оғриқли нуқтасига айланган бу муаммога депутат Расул Кушербаев ўз фикрлари билдирди:
“'UzAvto Motors'” монополияси ўзбекистонликларни кулгуга қолдирмоқда.
Мамлакат ичида ҳурмати деярли қолмаган монолистдан халққа фойда йўқлиги аллақачон маълум бўлган. Ҳатто Президент Шавкат Мирзиёев ҳам бу ҳақида айтиб ўтган.
Шунча зарари етмагандек ушбу 'имтиёзхўр монополист'нинг халқаро ҳамжамият ва ҳорижда ҳам мисқоллаб йиғилган мамлакат обрўси, имиджини тушириб, ўзбекистонликларни бошқа халқлар олдида кулгуга қолдираётгани аламли!
Ҳақини тўлаб, автомобилини ололмаётган истеъмолчиларга автомобиль етказиб бериш имконияти йўқ бўлса, айни вақтда хориж автомобилларига нисбатан божларни тушириш, энг тўғри йўл. Буни ҳукуматдаги амалдор ва мутахасссислар қўллаб-қувватлашлари керак.”
Эслатиб ўтамиз, аввалроқ Ўзбекистонда “LADA Vesta CW” ва “LADA XRAY” русумли автомобиллар ишлаб чиқарила бошлангани ҳамда “UzАuto Motors” машиналарини энг кўп сотиб олган давлатлар маълум бўлгани ҳақида ҳабар берилганди.
