МИБ ходимига болта кўтарган раис жазоланди

 

Ижтимоий тармоқларда шу йилнинг январь ойида Қашқадарёнинг Касби туманидаги маҳалла фуқаролар йиғини раиси Мажбурий ижро бюроси ходимига болта билан ташланиб, унга жароҳат етказгани ҳақида хабар тарқалган эди.

 

Шу иш бўйича Қарши шаҳрида ўтказилган журналист ва блогерлар иштирокидаги матбуот анжуманида маҳалла раисига қандай чора кўрилгани ҳақида маълум қилинди, деб хабар бермоқда.

 

МИБ Қашқадарё вилоят бошқармаси бошлиғи Одил Паяновнинг айтишича, Касби туманидаги “Хўжақарлиқ” МФЙ раиси Б.Қиличовдан давлат фойдасига солиқ қарзи ва давлат божи ундириш ҳақидаги ижро ҳужжати бўйича хонадонига борилганида, қарздор Б.Қиличов ижро ҳаракатларини олиб бораётган  давлат ижрочиси А.Нафасовга қаршилик кўрсатиб, унга болта билан  тан жароҳати етказган.

 

Ушбу ҳолат юзасидан жорий йилнинг 19 июль куни Б.Қиличовга нисбатан Жиноят ишлари бўйича Миришкор туман суди томонидан 3 йил ахлоқ тузатиш ишлари жазоси тайинланди.

 

“Шундай ҳолатлардан яна бири Шаҳрисабз шаҳрида ҳам содир бўлди. Қарздорликни ундириш учун автомашинани олишга борилганда, машинани беришдан бош тортиб, ходимларимизни судраб, машинани ҳайдаб, бостириб ўтиб кетган”, – дейди Одил Паянов

 

Маълумот ўрнида: жорий йилнинг шу давригача Қашқадарёда МИБ ходимига куч ишлатиш билан боғлиқ 5 та ҳолат кузатилган.

 

Эслатиб ўтамиз, аввалроқ қарздор фуқаро МИБ ходимини темир бўлаги билан уриб калтаклагани ҳамда Қашқадарёда фуқаролар МИБ ходимининг устига бензин сепиб ёқиб юбормоқчи бўлгани ҳақида хабар берилганди.

 

 

  Чўлпоной Аҳмедова