Хоразмда хонадонида 230 кг истеъмолга яроқсиз гўшт сақлаб келган фуқаро ушланди
Хоразмлик фуқаро ўз хонадонида истеъмолга яроқсиз 230 килограмм гўшт маҳсулотларини сақлаб келгани аниқланди. Бу ҳақда Ветеринария ва чорвачиликни ривожлантириш давлат қўмитаси матбуот хизмати хабар берди.
Маълум қилинишича, Давлат ветеринария хизматининг ИИБ Карантин бўлими ходимлари билан ҳамкорликдаги рейд тадбирлари ўтказилмоқда. Озиқ-овқат маҳсулотлари хавфсизлигини таъминлаш мақсадида ўтказилаётган тадбир доирасида Хоразм вилоятининг Хонқа туманида яшовчи фуқаронинг хонадони кўздан кечирилган.
Текширувлар давомида фуқаро келиб чиқиши номаълум бўлган жами 230 килограмм истеъмолга яроқсиз қорамол гўштини сақлаб келаётгани маълум бўлган.
Ушбу гўшт маҳсулотлари эскирган дея топилиб, белгиланган тартибда йўқ қилинган.
Аввалроқ Тошкент вилоятининг Нурафшон шаҳридаги яширин цехда қарийб 400 кг сифатсиз гўшт аниқлангани, бирламчи ветеринария ҳужжатларига эга бўлмаган 2254 кг. гўшт маҳсулотлари Қашқадарё-Тошкент йўналишида тўхтатиб қолингани ҳақида хабар берилганди.
