Мулла Бародар Афғонистонда хорижий давлатлар элчихоналарини очишга чақирди
“Толибон” раҳбарияти хорижий давлатлар элчилари билан учрашув ўтказди. Бу ҳақда “Спутник Афганистан” хабар берди.
30 сентябрь куни Афғонистон бош вазири биринчи ўринбосари Мулла Абдулғани Бародар мамлакатдаги хорижий давлатлар элчилари билан учрашган. Шунингдек, тадбирда ташқи ишлар вазири вазифасини бажарувчи Амирхон Мутаққий ҳам иштирок этган.
Мулла Бародар яна бир карра Афғонистон барча давлатлар билан яхши муносабат ўрнатиш ниятида эканини таъкидлади. “Агар кимнидир муаммоси бўлса, уни ҳурмат билан ечиш керак. Бизнинг ёрдамимиз ва режаларимиз ҳеч кимга зарар етказмаган”, – деган бош вазир ўринбосари. У, шунингдек, Афғонистонда элчихоналар очилишини, расмий муносабатлар ўрнатилишини илтимос қилган.
Маълумот ўрнида: АҚШ Афғонистонни тарк этгач, мамлакатда кўплаб элчихоналар фаолиятини тўхтатди. Шу билан бирга айрим мамлакатлар, хусусан, Афғонистон қўшнилари, Туркия, Покистон, Россия, Хитой ва бошқа давлат дипломатик миссиялар ўз ишини давом эттирмоқда.
Бундан аввал “Толибон” Қатар томонидан танқид қилингани ҳамда АҚШнинг Афғонистон қўшнилари билан музокара олиб бораётгани хабар қилинганди.
Жаҳонгир Қўзиев
