Июль-сентябрь ойларида 675 нафар қариндош йигит-қиз никоҳдан ўтган
Шу йилнинг июль-сентябрь ойларида ФҲДЁ органлари томонидан қариндош бўлган 675 нафар келин-куёвнинг никоҳи қайд қилинди. Бу ҳақда Давлат хизматлари агентлиги хабар берди.
Унда айтилишича, 285 нафар келин-куёв бир-бирига нисбатан холавачча, 172 нафари тоғавачча, 114 нафари амакивачча ва 104 нафари аммаваччалар.
Шунингдек, қариндошлар ўртасида энг кўп никоҳ қайд қилинган ҳудудлар Сурхондарё (268 та), Қашқадарё (179 та) ва Сирдарё (40 та) вилоятлари ҳиссасига тўғри келган.
Маълумот учун: Оила кодексининг 16-моддасига асосан насл-насаб шажараси бўйича тўғри туташган қариндошлар ўртасида, туғишган ва ўгай ака-укалар билан опа-сингиллар ўртасида, шунингдек фарзандликка олувчилар билан фарзандликка олинганлар ўртасида никоҳ тузиш тақиқланади.
“Мутахассислар фикрича, яқин қариндошлар ўртасидаги никоҳ юрак-қон томир касалликларининг туғма турлари келиб чиқишига сабаб бўлмоқда.” – дея таъкидлайди агентлик.
Бундан аввал ярим йилда 1272 нафар ўзбекистонлик қиз хорижликларга турмушга чиққани, 6 ойда 60 ёшдан ошган аёллар орасидан 152 та никоҳ ҳолати қайд этилгани ҳамда Туркияга келин бўлган ўзбек қизи тиллаларни олиб, уйидан қочиб кетгани ҳақида хабар берилганди.
Оламгир Абдиев
