Наманганлик аёл тунда босқинчиларга дуч келди
Жорий йилнинг 29 сентябрь куни Мингбулоқ туманида яшовчи, 1991 йилда туғилган аёл ариза билан мурожаат қилиб, шу йил 27 сентябрь куни соат 03:00 ларда Чортоқ туманида йўл четида ўтирган вақтида, олдига “Nexia” русумли автомашинаси келиб тўхтаб, автомашинада бўлган уч нафар нотаниш шахслардан бири тушиб, қўлида бўлган 200.000 сўм пули бўлган сумкасини қўлидан тортиб олиб кетганлигини маълум қилиб, чора кўришни сўраган.
Чортоқ туман ИИБ ходимлари томонидан олиб борилган тезкор-қидирув ва суриштирув ҳаракатлари натижасида ушбу жиноятни Учқўрғон туманида яшовчи, 1986 йилда туғилган A.Х.нинг бошқарувидаги “Nexia-2” русумли автомашинасида бирга келаётган шериги, Учқўрғон туманида яшовчи, 1981 йилда туғилган Х.И.лар содир этганлиги аниқланган.
Ушбу ҳолат бўйича Чортоқ туман ИИБ ҳузуридаги Тергов бўлинмаси томонидан Жиноят кодексининг 166-моддаси 1-қисми билан жиноят иши қўзғатилган.
Аввалроқ Тошкентда 3 нафар номаълум шахс дорихона сотувчисига таҳдид қилиб, 15 миллион сўмини ўмариб кетгани, сурхондарёлик бир қатор босқинчиларга чора кўрилгани ҳамда Юнусобод туманидаги бекатлардан бирида жойлашган дўконга ниқобланган икки нафар шахс қўлида пичоқ билан бостириб киргани ҳақида хабар берилганди.
Баҳринисо Мадумарова
