Тошкент вилоятидаги мебель цехида ёнғин юз берди
Тошкент вилояти Зангиота туманидаги мебель ишлаб чиқариш цехида ёнғин юз берди. Бу ҳақда ФВВ матбуот хизмати хабар берди.
Маълум қилинишича, Зангиота тумани "Чиғатой Оқтепа" МФЙ "Тошкент ҳалқа автомобиль йўли" кўчасида жойлашган мебель ишлаб чиқариш цехида ёнғин содир бўлаётгани тўғрисида хабар вилоят ФВБга 12 октябрь куни соат 15:08 да келиб тушган.
Таъкидланишича, 7 та ёнғин-қутқарув экипажи воқеа жойига соат 15:16 да етиб бориб, ёнғин соат 15:25 да қуршаб олинган ва соат 16:07 да батамом ўчирилган.
Ёнғин оқибатида мебель ишлаб чиқариш цехининг, тахминан, 170 квадрат метр майдондаги томи, шифти ҳамда ички жиҳозлари ёниб зарарланган.
Ҳодиса оқибатида жабрланган ва ҳалок бўлганлар йўқ.
Ҳозирда ёнғиннинг келиб чиқиш сабаби ва моддий зарар миқдори аниқланмоқда.
Аввалроқ Андижондаги икки қаватли савдо марказининг ертўласида ёнғин содир бўлгани, Самарқанд шаҳридаги хонадонларнинг бири ёниб кетгани, Жиззах вилояти Зарбдор туманидаги хонадоннинг оғилхонасида ёнғин юз бергани ҳамда Тошкент вилояти Ангрен шаҳридаги кўп қаватли уйда ёнғин чиққани ҳақида хабар берилганди.
