Қарздор хатланган "Malibu"cидан айрилиб қолишдан қўрқиб, қарзини тўлаб берди
Қидирувдаги машиси топилиб, хатланиш учун вақтинча автотураргоҳга жойлангандан сўнг қарздор фуқаро белигиланган суммани тўлаб берди. Бу ҳақда МИБ хабар берди.
Унда айтилишича, Фуқаролик ишлари бўйича Урганч туманлараро судининг жорий йил 16 февралдаги ижро ҳужжатига асосан қарздор А.И.дан ундирувчи корхона фойдасига жами 56.2 миллион сўм қарздорлик белгиланган.
Мазкур ижро ҳужжати бюронинг Урганч шаҳар бўлими иш юритувига келиб тушгач, ижро иши юритуви қўзғатилган. Қарор нусхаси тарафларга юборилиб, қарздорга иҳтиёрий муддат берилган.
Бироқ қарздор белгиланган суммани тўламагани сабабли ижро иши доирасида қарздорнинг барча йўналишларига чекловлар қўйилган. Шунингдек, унга тегишли бўлган "Malibu" русумли транспорт воситасига нисбатан ҳам бўлим томонидан қидирув эълон қилинган.
Олиб борилган қидирув ҳаракатлари натижасида мазкур транспорт воситаси Урганч тумани ҳудудида ҳаракатланиб юргани аниқланган. Шундан сўнг, автоулов хатланган ва Урганч туманидаги автомашиналарни вақтинча сақлаш жойига олиб борилган.
Қарздор ўзига тегишли бўлган транспорт воситасидан айрилиб қолишини билиб, қарз суммасини тўлаб берган. Ижро ҳаракатлари тўхтатилган.
Аввалроқ қарздорларнинг “Trailblazer” ҳамда “Nexia 3” русумли автоуловлари хатлангани ҳақида хабар берилганди.
Оламгир Абдиев
