Буюк Британия Орол билан боғлиқ янги лойиҳа учун 500 минг доллар ажратди

 

Буюк Британия “Возрождение ороли: Орол атрофида тадбиркорлик, табиатни асраш ва тараққиёт” лойиҳаси учун 500 минг доллар ажратди. Бу Darwin Initiative махсус грант дастури доирасида тақдим этилади.

 

Ушбу дастур ривожланаётган давлатларда қашшоқликни қисқартириш ва биологик хилма-хилликни асраш учун йўналтирилган. Унда Кент университети ҳузуридаги Даррель институти, Сайғоқларни қутқариш халқаро альянси, ФА Зоология университети ва Ўзбекистон   Экология қўмитаси иштирок этади.

 

Лойиҳа уч йилга мўлжалланган. Бу давр ичида Орол денгизидаги Возрождение ороли ва унинг атрофига алоҳида муҳофазаланадиган ҳудуд мақомини бериш режалаштирилган. Бу оролнинг ўзига хос биологик хилма-хиллигини, хусусан, йўқолиб кетиш хавфида бўлган сайғоқларни сақлаб қолишга ёрдам беради. Шу билан бирга маҳаллий аҳолини, энг аввало, туризмни ривожлантириш орқали доимий даромад манбаи билан таъминлаш мўлжалланмоқда.

 

“Бу ташаббус ҳукумат, бизнес, хорижий ҳамкорлар ва маҳаллий аҳолининг биргаликдаги ҳаракатлари орқали минтақанинг иқтисодий ва экологик имкониятларини намойиш қилишга ёрдам беради. Мақсад – Оролбўйининг қайта тикланиш рамзига айлантириш”, – дейди лойиҳа раҳбари, Кент университети профессори Жозеф Булл.

 

Возрождение ороли – Қорақалпоғистоннинг Мўйноқ туманида жойлашган. 1940 йилда унинг ҳудудида “Бархан” ҳарбий биокимё лабораторияси қурилган.

 

Бундан аввал Қорақалпоғистонда браконьерлар қўлга олингани хабар қилинганди.