Қорақалпоғистонда кийикларни ўлдириб УАЗда олиб кетаётганлар ушланди
Жорий йилнинг 10 сентябрь куни Судочье-Акпеткей буюртма қўриқхонаси давлат инспекторлари томонидан экологик ҳуқуқбузарликлар ва жиноятларнинг олдини олиш юзасидан Тахтакўпир тумани ҳудудида назорат тадбирлари амалга оширилган.
Ушбу тадбир давомида Тахтакўпир тумани "Дауқара" ОФЙ ҳудудида УАЗ русумли автомобил давлат инспекторларининг тўхташ ишорасига бўйсунмасдан қочиб кетган. Давлат инспекторлари томонидан ушбу УАЗ русумли автомашина 35 км узоқликгача кузатиб келинган. Бу ҳақда Судочье-Ақпеткей давлат буюртма қўриқхонасининг матбуот хизмати хабар бермоқда.
Айтилишича, ушбу автомашинадаги шахслар қочиш вақтида йўл бўйига кийикларни ташлаб, номаълум томонга яширинган.
Воқеа жойига Орол табиатни муҳофаза қилиш прокуратураси ҳамда Қорақалпоғистон Республикаси Экология қўмитасининг Назорат инспекциясидан тезкор гуруҳ етиб борган.
Мазкур УАЗ русумли автомашина тезкор топилиб, ҳозирги вақтда Орол табиатни муҳофаза қилиш прокуратураси томонидан терговга қадар текширув олиб борилмоқда.
Эслатиб ўтамиз, аввалроқ Ўзбекистонда энди ҳайвонлар қаттиқ ҳимоя қилинади: уларга нисбатан шафқатсизлик жиноий жавобгарликка сабаб бўлиши ҳақида хабар қилинганди.
