Ҳудудларда тиббиёт муассасалари замонавий ускуналар билан жиҳозланади
Эндиликда ҳар бир ҳудуд ва муассасаларда тиббий ускуналарга бўлган эҳтиёж аниқланади ва янгилари харид қилинади. Бу бўйича Президент қарори қабул қилинди.
Қарорга мувофиқ, давлат туман (ёки шаҳар) ва вилоят тиббиёт муассасалари учун 2021–2022 йилларда 100 млн. АҚШ долларигача йиллик 2 фоиз ставкада кредит маблағлари ажратилади. Бунда Молия вазирлиги талабномалари инобатга олинади ҳамда ажратиладиган сумма доллар эквиваленти билан миллий валюта шаклида бўлади.
Эслатма. Ушбу маблағлар талабномалар тақдим этилган санадан бошлаб 3 йил муддатгача берилади.
Шунингдек, маблағлар Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг асосланган талабномаларига қараб бюджет ссудаси сифатида ажратилади.
Эслатма. Маблағлар белгиланган ставкага кўра қайтариш шарти билан 3 йилдан кўп бўлмаган муддатга берилади.
Таъкидлаш керакки, тиббий ускуналарни харид қилиш бўйича техник топшириқлар ва тендер ҳужжатлари “Лойиҳалар ва импорт контрактларини комплекс экспертиза қилиш маркази” ДУКда комплекс экспертизадан ўтказилади.
Қарорда ёзилишича, энди ҳокимликлар ҳудудлардаги тиббиёт муассасалари мутахассисларининг етакчи хорижий тиббий муассасаларда малакасини ошириши учун тўғридан-тўғри шартномалар тузиши мумкин.
Эслатма. Бунинг учун шартнома Марказда комплекс экспертизадан ўтказилиши зарур.
Аввалроқ ноябрь ойидан бошлаб онкологик ва гематологик беморларнинг даволанишга келишларида транспорт харажатлари қопланиши, Ўзини ўзи банд қилган шахс сифатида мустақил ҳамширалик билан шуғулланишга рухсат берилиши ҳамда Мамлакатимизда янги фармацевтика университет фаолияти йўлга қўйилиши ҳақида хабар қилинганди.
Оламгир Абдиев
