Хоразмда валютафуруш фирибгар қўлга олинди
Унинг ёнида 41 316 АҚШ доллари, 17 000 россия рубли ва 62,7 миллион сўм бўлган.
Бош прокуратура ҳузуридаги Иқтисодий жиноятларга қарши курашиш департаменти ахборот хизмати хабарига кўра, департаментнинг Хоразм вилоят бошқармаси томонидан тезкор тадбир ўтказилди.
Аниқланишича, валюта қимматликларини қонунга хилоф равишда ўтказиш билан шуғулланиб келган фуқаро С.А. фуқаро И.дан жами 3 000 АҚШ долларини ҳар бир АҚШ долларини 10 700 сўмдан ҳисоблаб, 32,1 миллион сўмга сотиб олган вақтида ушланди.
Қайд этилишича, тадбир давомида унинг ёнида бўлган 41 316 АҚШ доллари, 17 000 россия рубли ва 62,7 миллион сўм ашёвий далил сифатида олинган.
Мазкур ҳолат юзасидан Жиноят кодексининг 177-моддаси (Валюта қимматликларини қонунга хилоф равишда олиш ёки ўтказиш) билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, аввалроқ қонунни бузган валютафурушнинг “бозори” ўхшамагани, Тошкентда сохта долларга телефон сотиб олган фирибгар ушлангани ҳамда Тошкент вилоятида қалбаки пул тайёрлаган шахслар қўлга олингани ҳақида хабар берилганди.
