Қонунни бузган валютафурушнинг “бозори” ўхшамади
Ғиждувон тумани деҳқон бозорида ноқонуний валютафурушлик билан шуғулланган шахс қўлга олинди.
Фуқаро A.Г. Ғиждувон тумани марказий деҳқон бозори кириш дарвозаси олдида валюта қимматликларини қонунга хилоф равишда олиш ва ўтказиш фаолияти билан шуғулланаётган вақтида Бухоро вилояти Ички ишлар бошқармаси ходимлари томонидан, Департаментнинг Пешкў туман бўлими ҳамда Миллий гвардия вилоят бошқармаси ходимлари билан ҳамкорликда ўтказилган тезкор тадбирда ушланди.
У ҳар бир AҚШ долларини 10.650 сўмдан ва Россия рублини 140 сўмдан ҳисоблаб, 600 AҚШ доллари ҳамда 140.000 рублни жами 25.990.000 сўмга сотиб олган вақтда қўлга олинган.
Мазкур ҳолат юзасидан A.Г.га нисбатан жиноят иши қўзғатилиб, дастлабки тергов ҳаракатлари олиб борилмоқда.
Эслатиб ўтамиз, аввалроқ чегарада қалбаки валюталарни олиб киришга бўлган уринишларнинг олди олингани ҳамда сохта долларга телефон сотиб олган фирибгарнинг ушлангани ҳақида хабар берилганди.
