Тошкентда "рангли" қор ёғди

 

 

Ёғин таркибини аниқлаш учун қордан намуналар олинган(pH (кислоталилик), электр ўтказувчанлик ва ион). Таҳлилдан маълум бўлишича, ифлосланган қор қатламлари таркибида қизғиш лой рангли модда кузатилган. Бунга 4 ноябрда Қозоғистон жанубида ва 16 ноябрда Бухоро вилоятида кузатилган қум бўронлари сабаб бўлганлиги айтилмоқда.

 

Гарчи Тошкентда 14 ноябрда ёғинлар ёғиб ҳаво тозаланган бўлса-да, Бухоро вилоятида ёғингарчилик бўлмади. 17 ноябрда эса республиканинг бутун худудига шамол ва баъзи жойларда қумли бўрон билан совуқ нам ҳаво массаси кириб келди.

 

 “Шамол тезлигидан кўтарилган чанг масофага кўчди ва тупроқ ва қум рангини бўяб Тошкент шаҳрига чўкди”, - дейилади Гидрометеорология хизмати хабарида.

 

Атмосфера ҳавоси таҳлил натижалари кўрсаткичларига кўра, қорнинг pH-9.6 ни ташкил этди. Бу ишқорли муҳит деб баҳоланмоқда. Чунки одатда pH-7 бўлади.

 

Шунингдек, электр ўтказувчанлик 73.2 ни ташкил этган, бу анионлар ва катионларнинг унча катта бўлмаган концентрациясидан далолат беради ва инсон саломатлигига зиён етказмайди.

 

“5:10 да Тошкент шаҳрида атмосфера ҳавосида муаллақ зарраларнинг кескин ошиши қайд этилди, улар 2.3 REMни ташкил этди. Ёғинлар ёғиши натижасида ҳавони тозаланиши содир бўлади”, - дейилади хабарда.

 

Аввалроқ Бухородаги бинолар қум бўронига дош беролмагани ҳамда чанг бўрони туфайли "Тез ёрдам"га чақириқлар сони ошгани ҳақида хабар берилганди.

 

Оламгир Абдиев