Ўзбекистонда "Аждодлар изидан" ҳарбий-тарихий жамияти ташкил этилади

 

Унга кўра, "Аждодлар изидан" ҳарбий-тарихий жамияти — муассаса шаклидаги нодавлат нотижорат ташкилоти, "Аждодлар изидан" илмий-оммабоп журнали таъсис этилади.

 

Қайд этилишича, мазкур вазифалар Мудофаа вазирлиги, Ички ишлар вазирлиги, Фавқулодда вазиятлар вазирлиги, Давлат хавфсизлик хизмати, Миллий гвардия, Маданият вазирлиги, "Ватанпарвар" ташкилоти муассислигида амалга оширилади.

 

Шунингдек, "Аждодлар изидан" жамиятининг асосий йўналишлари ҳам белгилаб берилди. Унга биноан, қадим ўтмишда, ўрта асрларда, яқин тарихда Ўзбекистон ҳудудида, шунингдек, унинг чегаралари ташқарисида бўлиб ўтган ҳарбий-тарихий аҳамиятга эга тарихий ҳужжатлар ва воқеалар тавсиф-баёнини тўплаш, миллат озодлиги ва мустақиллиги учун босқинчиларга қарши курашиб, қаҳрамонлик кўрсатган ҳарбий саркардалар, раҳбарлар, қабила ва халқ етакчилари, йўлбошчиларининг фаолиятини ўрганиш кабилар белгиланган вазифаларнинг бош асоси ҳисобланади.

 

Бундан ташқари, юртимиздаги музей, кутубхона ва архивларда, шу жумладан, хорижий давлатлардаги шу каби муассасаларда илмий-тадқиқот ва қидирув ишларини олиб боориш, таниқли олимлар, тарихчилар, археологлар, мутахассисларни жалб қилган ҳолда йиғилган маълумотларни тизимлаштириш, Ўзбекистон тарихида юз берган ҳарбий-тарихий воқеалар харитасини тузиш ва бошқа чора-тадбирларни ташкил этиш ҳам "Аждодлар изидан" жамиятининг муҳим мақсадлари сирасига киради.

 

Жамиятни бошқариш мудофаа вазири раислик қиладиган Кузатув кенгаши томонидан амалга оширилади. Жамоатчилик асосида фаолият юритадиган Кузатув кенгашининг йиғилишлари ҳар йили камида икки маротаба ўтказилади.

 

Шу билан бирга, Жамият фаолиятини самарали ташкил этиш мақсадида "Аждодлар изидан" ҳарбий-тарихий жамиятини ривожлантириш жамғармаси тузилади. У ҳар йили 1 февралга қадар муассисларнинг ҳар бири томонидан базавий ҳисоблаш миқдорининг 1 500 баробари эквиваленти миқдорида ажратиладиган маблағлар, Қорақалпоғистон Республикаси, вилоятлар ва Тошкент шаҳар ҳарбий-маъмурий секторларини ривожлантириш жамғармаси маблағлари, юридик ва жисмоний шахслар, шу жумладан, Ўзбекистон Республикаси норезидентлари томонидан амалга оширилган ҳомийлик хайриялари орқали молиялаштирилади. Маблағ билан таъминлашда қонунчилик ҳужжатлари билан тақиқланмаган бошқа манбалар ҳам ҳисобга олинади.

 

Аввалроқ “Меҳрибонлик” уйлари Миллий гвардияга бириктирилиши ҳақида хабар берилганди.

 

Оламгир Абдиев