Рецептсиз бериладиган дори воситаларининг рўйхати янгиланди

 

Маълумки, айрим дори воситалари шифокор тавсиясисиз истеъмол қилинса, инсон ҳаёти ва саломатлиги учун жиддий хавф туғдириши мумкин. Аммо яна шундай дори воситалари ҳам борки, уларни дорихоналардан ҳеч қандай чекловларсиз, яъни рецептсизсотиб олса бўлади.

 

Жорий йилнинг июль ойидан   Соғлиқни сақлаш вазирлиги буйруғи асосида рецептсиз бериладиган дори воситалари рўйхати кескин камайтирилди.

 

Унга кўра, монопрепаратлар позицияси 105 тага, мажмуавий препаратлар рўйхати эса 118 тага қисқарди.

 

Натижада, аҳоли қатлами рецептциз ҳам берилиши мумкин бўлган дориларни харид қилиш учун йўл босиб, вақт йўқотиб, навбат кутиб шифокор қабулига киришга мажбур бўлмоқда. Агар қўшимча текширувлар талаб этилса, яна навбат асосида тиббий хулосани билан врач ҳузурига такрор кириб рецепт ёздириш ҳолатлари кўп учрамоқда.

 

Беморларни бундай тарзда оввора қилиш ҳамда бюрократик тўсиқлар аҳолининг тиббиёт тизимига нисбатан ишончи камайишига ҳамда фармацевтика компанияларининг ҳақли эътирозларига сабаб бўляпти.

 

Чунки қонунга кўра, рецепт асосида бериладиган препаратларни тарғибот қилиш тақиқланган. Бу эса аҳолининг зарур дори воситалари ҳақидаги маълумотларини олиш ҳуқуқини чекламоқда.

 

Маълумот учун: темпалгин, мукомилт, дексафлю, табекс каби қатор препаратларни хориж  дорихоналаридан ҳеч қандай чекловларсиз харид қилиш мумкин. Бизда рецепт сўралади.

 

Вазирли  шу муаммоларга ечим топиш учун халқаро амалиёт ҳамда хорижий тажрибани чуқур ўрганган ҳолда, Монополияга қарши курашиш қўмитаси билан рецептсиз бериладиган дори воситалари рўйхатини бекор қилди ва уни янгилаш бўйича буйруқ лойиҳасини ишлаб чиқди.

 

Лойиҳа  regulation.gov.uz   порталида муҳокамага қўйилади.Шунингдек, Адлия вазирлиги томонидан рўйхатга олингач, қонунга мувофиқ кучга киради.

 

Эслатиб ўтамиз, аввалроқ айрим тиббий буюмлар ишлаб чиқариш учун лицензия талаб қилинмаслиги ҳақида хабар берилганди.

 

 

Чўлпоной Аҳмедова