ЙПХ ходимларининг устига машина ҳайдаган "крутой" икки кунда қўлга олинди

 

Жорий йилнинг 27 ноябрь куни соат 16:10 ларда Қашқадарё вилояти Чироқчи туманида ЙПХ ходимлари томонидан ўтказилган рейд давомида "Lacetti" русумли автомобиль тўхтатилган. Бироқ ҳайдовчи қонуний талабни бажармасдан автомобилнинг ойнаси ҳамда эшикларини қулфлаб ЙПХ ходимларининг устига қарата транспортни бошқарган ва воқеа жойидан қочиб кетган.

 

Ўтказилган тезкор тадбир давомида ушбу қоидабузар ҳайдовчи ушланди. 1998 йил туғилган Ҳ.А. атрофдагиларнинг ҳаёти ва соғлиғига хавф солган ҳолда воқеа жойидан қочиб кетишга урингани учун ҳолат тегишли тартибда ҳужжатлаштирилиб, автомобиль вақтинча сақлаш учун жарима майдонига жойлаштирилган.

 

Ҳайдовчи Ҳ.А.га нисбатан Чироқчи тумани прокуратураси томонидан Жиноят кодексининг 219-моддаси 1-қисми (Ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган ҳамда у ЖПКнинг 221-моддаси тартибида ушланган.

 

Аввалроқ, Тошкентда "Lacetti" ҳайдовчиси ЙПХ ходимига бўйсунмасдан қочиб кетгани ҳамда Сурхондарёда маст ҳайдовчи икки нафар ЙПХ инспекторини судраб кетгани ҳақида хабар берилганди.

 

Муножат Валиева