Моҳеб: Ғанининг кетиши Афғонистонга “юз фоиз” фойда бўлди
Афғонистон ҳукуматининг собиқ миллий хавфсизлик маслаҳатчиси Ҳамдуллоҳ Моҳеб “Америка Овози” билан суҳбатда Толибоннинг мамлкатга кириб келиши ва Ашраф Ғанининг кетиши ҳақида гапирди.
Унинг таъкидлашича, Толибон Кобул “дарвоза”сига етиб боргач, Ашраф Ғанини Кобулда қолдириш мақсад қилинган. Бироқ собиқ президент бошқа йўл тутган. Унинг кетиши эса Қўшма Штатлар билан маслаҳатсиз ва мувофиқлаштиришсиз бўлган.
Ҳамруллоҳ Моҳебнинг айтишича, Ғанининг Афғонистонни тарк этиш қарори “100 фоиз” Афғонистон фойдасига ишлади.
Шунингдек, унинг фикрига кўра, Афғонистондаги вазиятга Халилзод ҳам сабабчи.
“Халилзод Толибоннинг қўлидан ушлаб, Кобулга олиб келди. Бироқ, Афғонистон Республикасининг қулаши учун барча томонлар жавобгардир”, - дейди Моҳеб.
Ҳамдуллоҳ Моҳеб интервьюсида Толибон Покистоннинг ISA ҳарбий разведка бюроси кўрсатмаси остида Кобулга келганидан сўнг президент Ғанини “қатл қилиш”ни мақсад қилгани ҳақида маълумотга эга эканлигини айтган.
“Буни Афғонистон ҳукумати ҳам, АҚШ разведкаси ҳам билар эди”, - дейди у.
Маълумот учун, 2021 йил 15 августида Муҳаммад Ашраф Ғани ва унинг қўл остида ишлаган давлат хизматчилари Афғонистондаги зиддиятли вазият сабаб мамлакатни тарк этган. Шундан сўнг, орадан бир неча соат ўтиб, Толибон ҳукумат тепасига келганини эълон қилди.
Аввалроқ “Толибон” раҳбарияти БМТдан ёрдам сўрагани ҳамда Ашраф Ғани БААдан Афғонистон аҳолисига мурожаат қилгани ҳақида хабар берилганди.
Оламгир Абдиев
