Ёш тадбиркорларга 540 миллион сўмгача кредит берилади
Кредит беришдан аввал ёшлар ўртасида бизнес кўникмаларини шакллантириш ишлари амалга оширилади.
Бунда тадбиркорликка ўқитиш бўйича ўқув амалий курслари ташкил этилади. Дарслар “онлайн” ўтилиши ҳам режалаштирилган. Ўқитиш амалиёти мутлақо бепул.
Президент қарорига асосан, ёш тадбиркорларнинг янги бизнес лойиҳалари учун кредит маблағлари 2022-2024 йилларда қуйидаги шартлар асосида ажратилади:
🔸 кредит миқдори БҲМнинг 1000 бараваридан 2 минг бараваригача;
🔸 муддати – 7 йил, имтиёзли давр – 3 йил;
🔸 фоиз ставкаси – Марказий банкнинг асосий ставкасида(ҳозирда 14 %).
Маълумот учун, кредитлар ажратиш учун Ёшлар ишлари агентлиги, Савдо саноат палатаси ва банклар томонидан тадбиркорлик билан шуғулланиш истагидаги ёшлар рўйхати шакллантирилади.
Тадбиркорлик ва бизнесга ўргатиш, ўқув курсларини муваффақиятли тугатган ёшларга сертификат тақдим этилиб, улар томонидан ўз бизнесини ташкил этиш учун юқоридаги шартларда кредитлар ажратилади.
Диққат! Лойиҳани амалга ошириш учун ёшлар ТИФ Миллий банк(Марказий миллий банк) филиалларига ариза беради ва унга мувофиқ кредит ажратилади ёки асослантирилган ҳолда рад этилади.
Маълумот учун, Президентнинг 2021 йил 13 июлдаги ПФ–6260-сон Фармонига асосан Тикланиш ва тараққиёт жамғармаси томонидан ТИФ Миллий банкка 100 млн. доллар пул ажратилган.
Аввалроқ ёшларнинг алоҳида тоифаларига гаровсиз кредитлар ажратилиши ҳамда банкларга бериладиган кредитлар муддатини чеклаш амалиёти бекор қилиниши ҳақида хабар берилганди.
Оламгир Абдиев
