Туркия Афғонистон шимолидаги нефть конларини ўзлаштирмоқчи
Бунинг учун 250 миллион доллар инвестиция киритиш мўлжалланган.
Туркия Амударё бассейнидаги нефть конларини ўзлаштириш учун катта маблағ ажратмоқчи. Бу ҳақда Афғонистон тоғ-кон саноати вазирлигига таяниб Ariana News хабар берди.
Вазирлик расмий вакили Исматулла Бурхоннинг маълум қилишича, турк компаниялари бунинг учун 250 миллион доллар инвестиция киритмоқчи.. Аммо Бурхон бу айнан қайси компаниялар эканини очиқламаган. Шу билан бирга у Амударё нефти учун Марказий Осиё ва Эрон корхоналари ҳам рақобатлашаётганини маълум қилган.
Афғонистон савдогар ва инвесторлари ассоциацияси раҳбари Боз Муҳаммад Ғайратнинг таъкидлашича, мамлакат шимоли углеводородларга бой. У Россия компанияларини ҳам конларни ўзлаштиришга чақирган.
Маълумот ўрнида: 2006 йилда АҚШ геология хизмати шимолда 1.6 миллиард баррель нефть, 450 миллиард кубометр табиий газ ва 14 миллион куб метр суюлтирилган углеводород газ захиралари мавжудлигини аниқлаган. Амударё бассейнида кўплаб ўрганилмаган газ конлари бор.
Аввалроқ АҚШ Афғонистонга қўшимча 204 миллион доллар маблағ ажратгани тўғрисида хабар берилганди.
