Эронда ядро қуролини яратиш учун барча имконият бор
Мамлакат расмийси бу ҳақда маълумот берди.
Эрон техник жиҳатдан ядро қуроли яратишга қодир. Бу ҳақда Эрон Олий раҳнамоси маслаҳатчиси Камол Харрозий маълум қилди.
"Бир неча кун ичида уранни 60 фоизга бойитишга муваффақ бўлдик. 90 фоиз бойитилган уранни ҳам осонлик билан ишлаб чиқаришга қодирмиз. Эронда ядро бомбаси яратиш учун барча техник имконият бор, аммо Эрон бу бўйича ҳали қарор қабул қилмади", — деган у Al Jazeera нашрига берган интервьюсида.
Маълумот ўрнида: 2015 йилда Эрон ва АҚШ, Буюк Британия, Германия, Франция, Россия ҳамда Хитой ўртасида "Ҳамкорликдаги умумий ҳаракатлар режаси" имзоланган. Унга кўра, Теҳрон ядро қуроли ишлаб чиқишдан воз кечиши, Ғарб эса иқтисодий санкцияларни бекор қилиши лозим эди. Аммо 2018 йилда АҚШ бу келишувдан чиқиб кетди.
Жозеф Байден АҚШ президентига айлангач, келишувни қайтиб тиклаш ташаббуси билан чиқди. 2021 йилдан бошлаб Венада саккиз раундли музокаралар ўтказилди. 11 март куни томонлар ташқи факторлар туфайли танаффус олди. Унга асосий сабаб қилиб Россиянинг Украинадаги ҳарбий операцияси кўрсатилмоқда. Бунга қадар музокаралар финал босқичига чиққан ва февраль охирида якунланиши керак эди.
Аввалроқ АҚШ ва Франция ташқи сиёсий идоралари раҳбарлари Эрон ядро дастурини муҳокама қилганди.
