Шавкат Мирзиёев: Мен сизларнинг биринчи адвокатларингизман
Президентнинг тадбиркорлар билан мулоқоти бошланди.
Ўзбекистон президенти тадбиркорлар билан очиқ мулоқот бошида "Фаол тадбиркор" кўкрак нишони билан тақдирланганларга мукофотларни топширди.
Президент Шавкат Мирзиёев фармони билан бир қатор тадбиркорлар давлат мукофотлари билан тақдирланди. Улар орасида АҚШлик тадбиркор, Пахтакор туманидаги «Silverleafe» қўшма корхонаси бош директори Даниел Паттерсон ҳам бор. У «Дўстлик» орденига лойиқ кўрилган.
Шунингдек, яна кўплаб тадбиркорлар «Меҳнат шуҳрати», «Дўстлик» орденлари ва «Шуҳрат» медали билан тақдирланган.
Давлат раҳбари тақдирлаш маросимида бугунги кундаги тадбиркорлик ҳақида фикр билдирди.
"Қонунчилик палатасига ҳам мурожаат қилдик, керак бўлган қонунларниям ўзгартирамиз. Бугунги очиқ мулоқотда ҳам ўз таклифларимни айтаман. Бу таклифларимдан кейин саволлар ҳам камаяди, деб ўйлайман. Бу кимгадир ёқади-ёқмайди, мен сизларнинг биринчи адвокатларингман. Бепул адвокат", — деди президент.
Эслатиб ўтамиз, бу йил иккинчи маротаба тадбиркорлар билан очиқ мулоқот ўтказилмоқда.
