Хорижда вафот этган ўзбекистонликларнинг жасадини олиб келиш харажатлари давлат томонидан қопланади
Янги қонунга кўра, меҳнат мигрантлари вафот этган тақдирда жасадни олиб келиш харажатлари Миграция жамғармаси маблағлари ҳисобидан қопланади.
Ўзбекистонда меҳнат миграциясида бўлган фуқаролар вафот этган тақдирда уларнинг жасадини ватанга олиб келиш билан боғлиқ харажатлар эндиликда давлат томонидан қопланади. Бу норма “Дафн этиш ва дафн иши тўғрисида”ги қонунга киритилган янги қўшимча орқали белгиланди.
Мазкур тартибга кўра, меҳнат миграцияси даврида хорижда вафот этган Ўзбекистон фуқароларининг жасадини олиб келишни ташкил этиш харажатлари Миграция жамғармаси маблағлари ҳисобидан молиялаштирилади. Ушбу маблағлар Вазирлар Маҳкамаси ҳузуридаги Миграция агентлиги томонидан амалдаги қонунчиликка мувофиқ ажратилади.
Қонун Қонунчилик палатаси томонидан 2025 йил 1 июль куни қабул қилинган, Сенат томонидан эса 2025 йил 4 сентябрда маъқулланган. Ҳужжат билан бир қатор норматив-ҳуқуқий ҳужжатларга ўзаро мувофиқлаштиришга қаратилган ўзгартириш ва қўшимчалар ҳам киритилган.
Мазкур ўзгаришлар фуқароларнинг ҳуқуқ ва қонуний манфаатларини ҳимоя қилиш, шунингдек, меҳнат миграциясида бўлган юртдошларнинг оила аъзоларини ортиқча молиявий юкдан ҳимоя қилишга хизмат қилади. Шу билан бирга, жасадни ватанга қайтариш жараёнини молиявий жиҳатдан давлат томонидан қўллаб-қувватлаш механизми аниқ белгиланди.
