Чирчиқда жиноий гуруҳ раҳбаридан пора олган инспектор ушланди
У жиноий гуруҳнинг ишини “босди-босди” қилиб бермоқчи бўлган.
Тошкент вилояти Чирчиқ шаҳар Ички ишлар бошқармаси профилактика инспектори пора билан ушланди. Бу ҳақда ДХХ хабар берди.
Маълум қилинишича, профилактика инспектори жорий йил февраль ойида И.Саидов етакчилигидаги жиноий гуруҳ томонидан бошқа бир фуқарога етказилган тан жароҳати бўйича ҳолатни “босди-босди” қилиб бериш эвазига ундан олган 2700 АҚШ долларидан муқаддам 1000 долларини жабрланувчига берган.
Аввалроқ ушбу жиноий гуруҳ аъзолaри қўлга олингани ҳақида хабар берилганди.
Давлат хавфсизлик хизматининг Тошкент вилояти бўйича бошқармаси ходимлари томонидан ўтказилган тезкор тадбирда, профилактика инспектори жабрланувчига 300 АҚШ доллари берган вақтида ашёвий далиллар билан ушланди.
Ҳозирда унга нисбатан жиноят иши қўзғатилиб, тергов ҳаракатлари олиб борилмоқда.
Шунингдек, профилактика инспекторининг мазкур ноқонуний ҳаракатига алоқадор бўлган ҳамкасбини ҳам жиноят ишига жалб қилиш чоралари кўрилмоқда.
