Нукусда собиқ бошлиғини шантаж қилиб, 200 минг доллар олмоқчи бўлган ходим ушланди
У аввал ўзи ишлаган жамиятнинг обрўсини туширувчи маълумотлар борлигини айтиб, уларни тарқатмаслик эвазига фуқародан пул талаб қилган.
Қорақалпоғистоннинг Нукус шаҳрида товламачилик йўли билан собиқ раҳбаридан 200 минг АҚШ доллари талаб қилган шахс қўлга олинди. Бу ҳақда Ички ишлар вазирлиги хабар берди.
Маълум қилинишича, 1980 йилда туғилган чет эл фуқароси Қорақалпоғистон Ички ишлар вазирлигига ариза билан мурожаат қилган. Аризада ўзи раҳбарлик қилаётган жамиятнинг Нукус шаҳридаги филиалида ўтган йилнинг ноябрь ойидан 2026 йилнинг февраль ойигача оператор сифатида ишлаган С исмли шахснинг унга интернет орқали хат ёзиб, ушбу жамиятнинг обрўсини туширувчи маълумотлар борлигини айтиб, қўрқитаётганини билдирган.
Ҳар хил гаплар билан босим ўтказган мазкур С исмли Нукус шаҳрида истиқомат қилувчи фуқаро 200 минг доллар бермаса, ушбу маълумотларни оммавий ахборот воситаларига тарқатиб юборишини айтган.
Мазкур фуқаро муқаддам Жиноят кодексининг тегишли моддалари билан судланган. Амалга оширилган тезкор-қидирув тадбири давомида С исмли фуқаро Нукус шаҳридаги меҳмонхоналардан бирида ариза эгасидан 200 минг долларни олган вақтида тадбир иштирокчилари томонидан ашёвий далиллар билан ушланган.
Мазкур ҳолат юзасидан Жиноят кодексининг 165-моддаси (товламачилик) билан жиноят иши қўзғатилган.
