Қорақалпоғистонда кадастр бўлими раҳбари пора билан ушланди
У ўзбошимчалик билан қурилган ва бузилиши белгиланган бинонинг кадастр ҳужжатларини расмийлаштириб бермоқчи бўлган.
Қорақалпоғистон туманларидан бирида фаолият юритган Кадастр бўлими бошлиғи пора билан қўлга олинди. Бу ҳақда ДХХ хабар берди.
Маълум қилинишича, мазкур мансабдор шахс 1987 йилда туғилган фуқаро томонидан ўзбошимчалик билан эгаллаб олинган 132 м² ер майдонида қурилган, лекин фуқаролик ишлари бўйича суднинг 2024 йилдаги ҳал қилув қарорига асосан мажбуран бузилиши белгиланган бинога нисбатан мулк ҳуқуқини эътироф этиш ва унинг кадастр ҳужжатларини расмийлаштириб беришни ваъда қилган.
У ўз хизмат мавқеидан фойдаланиб, фуқародан 2 минг АҚШ доллари миқдорида пора олган вақтида Давлат хавфсизлик хизмати ходимлари томонидан ашёвий далиллар билан ушланди.
Ҳозирда кадастр раҳбарига нисбатан жиноят иши қўзғатилиб, тергов ҳаракатлари олиб борилмоқда.
